३३ बर्षको उमेरमा अझै पनि माथिल्लो तहको फुटबलमा एकै किसिमको धार कायम गर्न सफल अर्जेन्टाइन लियोनेल मेस्सी बार्सिलोनाको लागि सानो उमेरबाट खेल्दै क्लबको सर्वाधिक गोलकर्ता बनेका ह्न् । क्याटलन क्लब छोड्ने घोषणा गरेसँगै कस्ता छन् त मेस्सीको अहिलेसम्मका उपलब्धिहरु । एकपटक हेरौंः
बार्सा एकेडेमी
अर्जेन्टिनाको रोजारियोमा जन्मिएका मेस्सी १३ बर्षका थिए जब उनी बार्सिलोना एकेडेमीमा खेल्नका लागि आफ्नो परिवारसँगै स्पेन आइपुगेका थिए । हर्मोन बढ्ने समस्यले ग्रस्त भएका मेस्सी निकै साना थिए र उनको उपचारका लागि बार्सिलोनाले मासिक १ हजार डलर बेहोर्ने शर्तमा आफ्नो एकेडेमीमा ल्याएको थियो ।
शुरुवाती दिनहरुमा मेस्सीलाई होम सिक भएपछि मेस्सी संघर्ष गर्दै बार्साको पहिलो टिमबाट २००४ मा १७ बर्षको उमेरमा डेब्यु गर्न सफल भएका थिए । त्यही सिजन उनी बार्सिलोनाका लागि गोल गर्ने सबैभन्दा कान्छा खेलाडी बनेका थिए ।
ओलम्पिक स्वर्ण
२००८ को बेइजिङ ओलम्पिकमा मेस्सीले अर्जेन्टिनालाई लगातार दोश्रो पटक स्वर्ण पदक जित्न मद्दत गरेका थिए । यस क्रममा अर्जेन्टिनाले सबै ६ वटै खेल जित्दा मात्र दुई गोल खाएको थियो । हाभियर मासेरानो र एन्जेल डि मारियासँगै खेलेका मेस्सीले ओलम्पिक स्वर्ण उनका लागि सबैभन्दा महत्वपूर्ण रहने गरेको बताउदै आएका छन् ।
तर १९९२ मा स्पेनका लागि ओलम्पिक स्वर्ण जितेका पेप ग्वार्डियोला बार्साको प्रशिक्षक नियुक्त नभएको भए मेस्सीले २००८ को ओलम्पिकमा सहभागिता जनाउन पाउने थिएनन् । ७० गोलसहित अर्जेन्टिनाको किर्तिमानी गोलकर्ता रहेका मेस्सीको खेल जिवनमा अर्जेन्टिनाको लागि सबैभन्दा ठूलो उपलब्धि ओलम्पिक स्वर्ण मात्रै हो ।
बालोन डि ओर
२००९ मा बिश्वकै सबैभन्दा प्रतिष्ठित फुटबल पुरस्कार जित्ने क्रममा मेस्सीले रियल म्याड्रिडमा भर्खरै प्रवेश गरेका पोर्चुगिच स्टार क्रिष्चियानो रोनाल्डोलाई पछि पारेका थिए । २००९ मेस्सीले आफूलाई फुटबलको नयाँ सुपरस्टारको रुपमा स्थापित गरेको बर्ष रह्यो । त्यो सिजन मेस्सीले बार्सालाई च्याम्पियन्स लिग जिताउने क्रममा ९ गोल गरे भने म्यानचेस्टर युनाइटेडबिरुद्धको फाइनलमा २–० जित हात पार्दा एक गोल पनि गरेका थिए ।
ग्वार्डियोलाको बार्सिलोनाले त्यही सिजन कोपा डेल रे र स्पेनिस ला लिगाको उपाधि जित्दा बार्साले इतिहासमै पहिलो पटक ट्रेबल जितेको थियो । गत डिसेम्बर नै मेस्सीले आफ्नो छैटौं बालोन डि ओर जितेका थिए ।
महान मुलर नै पछाडी
२००९ पछि २०११–१२ को सिजन पछि मेस्सीको लागि बिशेष रहन पुग्यो । त्यो सिजन मेस्सीले ला लिगामा ५० गोल गरे भने सबै प्रतियोगिताहरु गर्दै ७३ गोलका साथ युरोपमा एकै सिजन सबैभन्दा बढी गोल गर्ने खेलाडी पनि बने । यस क्रममा उनले जर्मन महान फुटबलर गर्ड मुलरको ६७ गोलको किर्तिमान तोडेका थिए ।
जर्मन क्लब बायर लेभरकुसनलाई बार्साले ७–१ ले हराउदा मेस्सी च्याम्पियन्स लिगको एकै खेलमा पाँच गोल गर्ने पहिलो खेलाडी पनि बनेका थिए । यो किर्तिमान अझै पनि कायनमै रहेको छ । मेस्सीको लागि व्यक्तिगत रुपमा यो सिजन उत्कृष्ट रहे पनि बार्साको लागि भने थिएन ।
बार्सा च्याम्पियन्स लिगको सेमिफाइनलमा चेल्सीसँग पराजित भयो भने ला लिगाको उपाधि पनि चिर प्रतिद्वन्दी रियल म्याड्रिडलाई सुम्पन पुग्यो ।
गोल, गोल, गोल
मेस्सी जम्मा २४ बर्षका थिए जब उनले बार्साका लागि सबैभन्दा बढी गोल गर्ने सेजार रोदि«गेजको ५७ बर्ष पुरानो किर्तिमान तोडे । २०१२ को ला लिगा म्याचमा ग्रानडाबिरुद्ध ह्याट्रिक पुरा गर्दै मेस्सीले नयाँ किर्तिमान कायम गरेका थिए ।
हालसम्म आइपुग्दा रोदि«गेजभन्दा चार सय गोल बढी गरिसकेका मेस्सीले बार्साको लागि ६ सय ३४ गोल गरेका छन् । त्यसमा ४ सय ४४ त स्पेनिस ला लिगामै रहेको छ । उनले कायम गरेको ३६ ह्याट्रिकको नजिक शायदै बार्सिलोनामा अब कोही नजिक पुग्न सक्लान् ।
७ सय को कोशढुँगा
कोरोना भाइरस लकडाउनपछि फुटबल सिजन सुचारु हुंदा मेस्सीले क्लब र देश गरेर करिअरमा आफ्नो ७ सयौं गोल पुरा गरे । जुनमा एट्लेटिको म्याड्रिडबिरुद्ध ला लिगा भएको २–२ को बराबरीमा मेस्सीले पनेंका पेनाल्टीमार्फत आफ्नो करिअरको ७ सयौं गोल गरेका थिए । तर यो सिजन भने मेस्सी र बार्सिलोनाकै लागि उपलब्धिमुलक भने रहेन । २००७ पछि पहिलो पटक बार्सिलोना उपाधि बिहिन रहन पुग्यो । यो पनि मेस्सीकै समयमा भयो ।