क्लबलाई औपचारिक रुपमा लियोनेल मेस्सीले बार्सिलोनासँगको सम्झौता रद्द गर्न आग्रह गरिराख्दा अर्जेन्टाइन स्ट्राइकरले आफ्नो अर्को गन्तब्य तय गरिसकेको हुन सक्छ ।
६ पटकको बालोन डि ओर बिजेता मेस्सीले आफ्नो व्यवसायिक करिअरको अर्को अध्याय म्यानचेस्टर सिटीबाट शुरु गर्नका लागि तयार भएको फुटबल बिज्ञ मार्सेलो बेच्लरले आफ्नो लेखमा उल्लेख गरेका छन् । अर्को खेल म्यागजिन दि एथ्लेटिकले मेस्सी सिटीमा सम्झौताको लागि तयार रहेको बताएको छ ।
प्रख्यात खेलकुद च्यानल इएसपिएनले सिटीका व्यवस्थापक पेप ग्वार्डियोलाले गत साता म्यानचेस्टरमा आउने बिषयमा मेस्सीसँग टेलिफोन वार्ता गरिसकेका छन् । मिडिया रिपोर्टका अनुसार सिटीले फाइनान्सियल फेयर प्ले (एफएफपी) नियम नमिच्दै मेस्सीलाई क्लबमा ल्याउन गृहकार्य गरिरहेको र यसमा क्लब निकै आशावादी पनि रहेको छ ।
सिटी समर्थकहरुलाई एफएफपीका बारे स्पष्ट गरिराख्नु पर्ने छैन किनकी केहि महिनाअघि यो नियम मिचेको आरोपमा सिटीलाई दुई बर्ष युरोपमा खेल्न नपाउने प्रतिबन्ध लागेकै हो । यद्दपि यो प्रतिबन्ध खारेज गरिएपछि अब भने सिटीलाई मेस्सी ल्याउन केही सहज पनि भएको छ ।
अर्को बलियो आधार के पनि छ भने कोरोना भाइरस महामारीका कारण एफएफपीलाई केही खुकुलो बनाइएको कारण सिटीले मेस्सीलाई ठूलो रकममै पनि भित्र्याउन सक्छ । मेस्सीको लागि बार्सिलोनाले ७ सय मिलियन डलरको रिलिज क्लज तय गरेको छ । रकम ठूलै भएपनि सिटीको अबु धाबीका धनाढ्य मालिकलाई गाह्रो भने देखिदैन ।
क्लब र खेलाडीबीच अब कानुनी लडाई उत्पन्न हुन सक्ने परिस्थितिका कारण मेस्सीले अब यो लडाई कहासम्म लिएर जान चाहन्छन् पनि मुख्य मुद्दा रहनेछ । बार्सासँगको अन्तिम बर्षको सम्झौता एकपक्षीय रुपमा रद्द गर्ने अधिकार मेस्सीसँग रहे वा नरहेकोले पनि धेरै कुरा निर्धारण गर्न सक्नेछ ।
यदि मेस्सी क्लबसँगको टकरावमा बिजयी हुने हो भने उनलाई सिटी अथवा अन्य कुनै पनि क्लब जान मार्ग प्रशस्त हुनेछ । यदि असफल नहुने हो भने पनि बार्सिलोनालाई एक दशकदेखि सम्हालेर हिडेका मेस्सीबिना क्लबलाई कसरी लिएर जाने भन्ने टाउको दुखाई व्यवस्थापन पक्षलाई भने हुने नै छ ।