मोहम्मद नाबी लगातार दोश्रो खेलमा नायक बन्दा सेन्ट लुसिया जुक्सले सेन्ट किट्स एण्ड नेभिस प्याट्रिअट्स माथि १० रनको रोमान्चक जित हात पारेको छ । तेश्रो खेलमा जुक्सको यो लगातार दोश्रो जित हो ।
जुक्सले दिएको १७३ को विशाल लक्ष्य लिएर ब्याटिङमा आएको प्याट्रिअट्सले पुरै २० ओभर खेल्दै आठ विकेटको नोक्सानीमा १६२ रन मात्र बनाउन सक्यो ।
प्याट्रिअट्सको तर्फबाट दिनेश रामदिनले सर्वाधिक ४६ तथा ११ औं नम्बरमा ब्याटिङ गर्न आएका शेल्डनले ११ बलमा तुफानी २६ रन बनाए पनि आफ्नो टोलीलाई जित भने दिलाउन सकेनन् ।
जुक्सलाई १० रनको रोमान्चक जित दिलाउने क्रममा स्कट कग्गेलेइजले सर्वाधिक चार विकेट र रोस्टन चेजले तीन विकेट लिए भने मोहम्मद नाबीले पनि एक विकेट हात पारे ।
यस अघि खेलमा टस हारेर पहिले ब्याटिङ गरेको जुक्सले २० ओभर खेल्दै छ विकेटको नोक्सानीमा १७२ रनको विशाल योगफल तयार गर्यो ।
जुक्सको लागि ओपनर एन्ड्रयु फ्लेचरले सर्वाधिक ४६ रन जोडे भने खेलको म्यान अफ द म्याच घोषित नाबीले २२ बलमा एक चौका र तीन छक्काको मद्धतमा तुफानी ३५ रनको पारी खेले ।
प्याट्रिअट्सका जोन-रस जगेसर र शोहेल तन्बिरले सामना २-२ विकेट हात पारे ।