ज्याक क्रलीको डेढ सय रन तथा जस बटलरको अर्धशतकको मद्धतमा तेश्रो टेस्टको पहिलो दिन घरेलु टोली इंग्ल्यान्ड पाकिस्तान विरुद्ध विशाल योगफल तर्फ अग्रसर भएको छ ।
खेलमा टस जितेर पहिले ब्याटिङ गरेको इंग्ल्यान्डले पहिलो दिनको खेलको समाप्तीमा ९० ओभर खेल्दै चार विकेटको नोक्सानीमा ३३२ रन बनाएको छ ।
खराब सुरुवात गरेको इंग्ल्यान्डको पारी सम्हाल्ने क्रममा क्रली र बटलरले अविजित रहँदै क्रमश १७१ तथा ८७ रन बनाएका छन् । १२७ रनको अवस्थामा चार विकेट गुमाएको इंग्ल्यान्डको लागि दुईले अविजित २०५ रनको साझेदारी गरिसकेका छन् । टेस्टमा आफ्नो पहिलो शतक प्रहार गरेका क्रलीले २६९ बलको सामना गर्दै १९ चौका तथा बटलरले १४८ बलमा नौं चौका र दुई छक्का प्रहार गरे ।
छ रन बनाएका ओपनर रोरी बर्न्सलाई शाहिन शाह अफ्रिदीले आउट पार्दै पाकिस्तानको लागि राम्रो सुरुवात दिएका थिए । त्यस पछि अर्का ओपनर डोम सिब्ली (२२ रन) र ओली पप (तीन रन) को विकेट याशिर शाह तथा २९ रन बनाएका कप्तान जो रुटको नसिम शाहको शिकार भए पछि इंग्ल्यान्डले खराब सुरुवात गर्यो ।
सुरुवातमा नै पाकिस्तानका याशिरले दुई तथा अफ्रिदी र नसिमले १-१ विकेट हात पारे पनि इंग्ल्यान्ड विशाल योगफल तर्फ लम्केको हो ।
तीन टेस्ट म्याचको शृंखलामा इंग्ल्यान्ड १-० ले अघि रहेको छ । पहिलो टेस्ट इंग्ल्यान्डले तीन विकेटले जितेको थियो भने दोश्रो टेस्टमा बर्षा बाधक हुँदा खेल बराबरीमा सकिएको थियो ।
