स्टार खेलाडी लियोनेल मेस्सीले केहि दिन अघि मात्र नियुक्त भएका नयाँ प्रशिक्षक रोनाल्ड कोमनलाई आफ्नो भबिष्य बार्सिलोना भन्दा बाहिर रहेको बताएको क्याटलन रेडियो आरएसी-१ ले जनाएको छ ।
आरएसी-१ ले जनाए अनुसार च्याम्पियन्स लिग अन्तर्गत बायर्न म्युनिख विरुद्धको खेलमा ८-२ गोल अन्तरले पराजित भए पछि छुट्टी मनाउन गएको र कोमनलाई भेट्नका लागि उनले आफ्नो छुट्टी घटाएर बार्सिलोना आएका थिए । मेस्सीले कोमनलाई क्लबका अध्यक्ष योसेप मारिया बार्तोमु प्रति बिश्वास नरहेका कारण आफ्नो भविष्य बारेमा सोचेको आरएसी-१ ले जनाएको छ ।
मेस्सीले कोमनलाई ‘आफु क्लब भित्र भन्दा पनि बाहिर’ रहेको आरएसी-१ ले आफ्नो समाचारमा बताएको छ । पछिल्लो समय मेस्सीको क्लबसँगको सम्बन्ध राम्रो नरहेको र उनले क्लब छाड्ने हल्ला चल्न थालेको छ ।
युरोपको सबैभन्दा सशक्त टोलीबिरुद्ध बार्सिलोनाको बिगतका असफलताहरुलाई लुकाउन जिम्मेवारी लियोनल मेस्सी एक्लैलाई दिइएको थियो । मेसीले बारम्बार हामी राम्रो छैनौं भन्दै आइरहदा बायर्नसँगको हारले बार्साको टोली अब त्यही लयमा खेल्न नसक्ने कुरालाई स्पष्ट नै पारिदिएको छ । मेस्सीले टोलीमा अब त्यो धार नरहेको फेब्रुवरीमा भन्दै आइरहेका थिए, र जुलाईमा पनि ।
३३ वर्षिया मेस्सीले बार्सिलोना छाडेको खण्डमा कुन क्लब जानेछन् भन्ने पनि चर्चा सुरु भएको छ । तर मेस्सीलाई क्याम्प नाउ छाडेर अन्यत्र जान सहज भने हुने छैन । उनको बार्सासँगको सम्झौता आगामी सिजनको अन्त्य सम्म रहेको छ र उनलाई अन्य क्लबले अनुबन्ध गर्न चाहेको खण्डमा सात सय मिलियन युरो खर्च गर्न पर्ने हुन्छ ।
