“कोमन, वेम्ब्लीका हिरो, फर्किएका छन्,” बार्सिलानोका अध्यक्ष योसेप मारिया बार्तोमुले रोनाल्ड कोमन नयाँ प्रशिक्षक हुने घोषणा गरेको भोलिपल्टै क्याटलन क्लबले रवाफका साथ उनको नाममा एक बिज्ञप्ति जारी गर्यो ।
यस्तो महसुस हुन्छ की बार्सिलोनाले बायर्न म्युनिखबिरुद्ध शुक्रबार च्याम्पियन्स लिगमा भोगेको लज्जास्पद पराजयलाई कोमनको नियुक्तिले नै बिर्साउने प्रयास गरेको छ । किके सेटियनलाई बर्खास्त गरेपछि ५७ बर्षिय कोमन बार्साको टोली सम्हाल्ने पाचौं डच प्रशिक्षक हुन गइरहेका छन् ।
यसअघि राइनस मिकेल्स, योहान क्रुएफ, लुई भान हाल र फ्रांक राइकार्डले बार्सिलोनाको टोली सम्हालेका थिए । डच प्रशिक्षकको नियुक्त नौलो त होइन तर बार्सा अहिले यस्तो स्थितिमा छ जहाँ असन्तुष्ट खेलाडीहरुको माग सम्बोधन गर्नका लागि उसले कोमनको आगमनलाई पनि महान बनाइरहेको छ ।
“खेलाडीको रुपमा आएको ३० बर्षपछि पहिलो युरोपियन कप उपाधि जिताउनलाई महत्वपूर्ण भुमिका निभाएका कोमन फेरि क्लबमा फर्किएका छन् । बार्सा लेजेण्डको पुनरागमन,” बार्सिलोनाले बिज्ञप्तिमा लेखेको छ ।
के कोमन साच्चिकै महान हुन् त ?
मे २०, १९९२ मा बार्सा युरोपियन कपको फाइनलमा इटालियन क्लब साम्पडोरियाबिरुद्ध खेलिरहेको थियो । लण्डनको वेम्ब्ली स्टेडियममा निर्धारित समय बराबरीमा टुंगिएपछि खेल अतिरिक्त समयमा धकेलिन पुग्यो । अतिरिक्त समयमा कोमनले नै गोल गर्दा बार्साले पहिलो पटक युरोपियन कपको उपाधि जितेको थियो ।
खेलाडीको रुपमा कोमन १९८९ मा बार्सिलोना आइपुगेका थिए । उनी त्यो समय डिएगो म्याराडोनापछि क्लब फुटबल इतिहासकै दोश्रा महँगा खेलाडी बनेका थिए । युरोपमा प्रख्यात र कुख्यात दुवै बनेका म्याराडोना लाजियोबाट खेल्ने गर्दथे ।
बार्सामा ६ सिजन पुरा गर्दा कोमनले २ सय ६४ खेल खेल्दै ८८ गोल गरेका थिए भने क्रुएफको ड्रिम टिमको हिस्सा बन्दै १९९१ देखि १९९४ सम्म लगातार चार पटक ला लिगा जित्न सफल भएका थिए ।
चरम संकटको समयमा बार्सिलोना आइपुगेका कोमनले प्रशिक्षण करिअरमा औषत प्रदर्शन गरेका छन् । बार्सा २००७ पछि पहिलो पटक उपाधि बिहिन हुन पुगेको छ । मङ्गलवार नै बार्साले आफ्नो स्पोर्टिङ्ग डाइरेक्टरलाई पनि बर्खास्त गरेको थियो । बायर्नसँगको लज्जास्पद हार र बोर्ड भित्रको मदभेदको मुल्य अबिडालले पनि चुकाएका छन् ।
बुधबार नै रामोन प्लेन्सले अबिडालको स्थान लिएका थिए । बार्सा आउने क्रममा कोमनले आफ्ना सहायक ड्वाइट लोडवेजेसलाई स्थान छोडेका छन् । नेदरल्याण्ड्सको फुटबल संघले अब कोमनको स्थानमा नयाँ प्रशिक्षक खोज्नु पर्नेछ । युएफा नेसन्स लिग अन्गर्तत नेदरल्याण्ड्सले सेप्टेम्बर ४ मा पोल्याण्ड र त्यसको तीन दिनपछि इटालीको सामना गरिरहेको छ ।
तर कोमनलाई अब शायद दुनियाकै सबैभन्दा गाह्रो काम परेको छ । उनले यस्तो क्लबको व्यवस्थापन गर्नुपर्नेछ जहाँ खेलाडी रुष्ट छन् र बोर्डमा राजनीति । र मैदानको प्रदर्शन शुन्य । अहिले बार्सा मात्र नभएर बिश्वकै महान खेलाडी लियोनल मेस्सी समेत क्लब छोड्ने मनसायमा पुगिसकेका छन् ।
स्पष्ट छ, मेस्सीले क्लब छोड्ने हो भने बार्सामा ठूलो भुकम्प आउनेछ भने अन्य खेलाडीहरुले पनि क्लब छोड्न सक्नेछन् । त्यसपछि बार्सालाई युवा खेलाडीहरु बटुल्दै टिम पुर्ननिर्माण गर्ने जिम्मा कोमनकै थाप्लोमा आउनेछ । खेलाडीको रुपमा महान बनिसकेका कोमनले क्लबलाई अहिलेको स्थितिबाट उकास्ने हो भने प्रशिक्षकको रुपमा पनि महान बन्ने अवसर पाउनेछन् ।
“सबैलाई थाहा छ बार्सिलोना मेरो लागि ड्रिम क्लब हो भनेर । बार्साको व्यवस्थापक बन्नु मेरो लागि बिशेष छ,” कोमनले आफ्नो नियुक्तिपछि भने ।