पेरिस सेन्ट जर्माइन (पिएसजी) का अर्जेन्टाइन मिडफिल्डर एन्जेल डि मारियाले च्याम्पियन्स लिग सेमिफाइनलमा आरबी लाइपजिगबिरुद्ध गोल गरेपछि अब आफू सत्न नसक्ने बताएका छन् ।
पिएसजीले लाइपजिगलाई ३–० ले पराजित गर्दा डि मारियाले दोश्रो गोल गरेका थिए । फ्रेञ्च लिग वान च्याम्पियनका लागि मार्किन्होस र हुवान बर्नाटले गोल गरेपछि पिएसजी इतिहासमै पहिलो पटक युरोपको सबैभन्दा ठूलो क्लब फुटबल प्रतियोगिताको फाइनल प्रवेश गरेको थियो ।
पोर्चुगलको राजधानी लिस्बनमै हुने फाइनलमा पिएसजीले अब कि त बायर्न म्युनिख अथवा फ्रान्सकै लायोनको सामना गर्नेछ । “फाइनल दिमाग खेल्ने भएकाले अब मलाई आज राती सुत्न निकै कठिन हुनेछ,” डि मारियाले भने ।
“हामी निकै खुशी छौं । टिमको रुपमा नै निकै राम्रो खेल्दै हामी पहिलो पटक पिएसजीलाई फाइनलमा पुर्याउन सफल भएका छौं । अब फाइनल हाम्रो लागि निकै महत्वपूर्ण रहेको छ र यदि यसरी नै खेल्ने हो भने उपाधि पनि जित्ने छौं,” उनले भने । सेमिफाइनलमा दुई–दुई वटा फ्रेञ्च लिव वान र जर्मन बुन्डेसलिगाका टोली रहेकाले प्रतिस्पर्धा कति स्तरीय रहेको स्पष्ट भएको डि मारिया बताउछन् ।
“हामीले फ्रेञ्च र जर्मन लिग अन्य लिगहरुकै तुलनामा कति स्तरीय रहेको स्पष्ट बनाइसकेका छौं । हामीले जे गरिरहेका छौं त्यसलाई निरन्तरता दिन आवश्यक छ,” उनले भने । २०१४ मा रियल म्याड्रिडसँग पोर्चुगलमै च्याम्पियन्स लिग जितेका डि मारियाले पिएसजीको अहिलेको टोलीलाई स्पेनिस महारथीसँग तुलना गर्न समेत भ्याएका थिए ।
