च्याम्पियन्स लिगको गर या मरको स्थितिमा रहेको फ्रेञ्च च्याम्पियन पेरिस सेन्ट जर्माइन (पिएसजी) क्वार्टर–फाइनल अघि एक पटक फेरि प्रमुख खेलाडीहरुको चोटले समस्याग्रस्त रहेको छ ।
तर यस पटक नेमार भने पूर्ण रुपमा फिट छन् ।
आफू संसारको सबैभन्दा महँगो फुटबलर यसै भएको होइन भन्ने साबित गर्न उनका लागि पर्फेक्ट स्टेज (उपयुक्त मञ्च) तयार छ ।
कोरोना भाइरसका कारण एक लेगमा सिमित रहेको क्वार्टर फाइनल (त्यसपछि सेमिफाइनल पनि) मा नेमारको पिएसजीले इटालियन क्लब एट्लान्टाको सामना गर्न गइरहेको छ । पोर्चुगिज राजधानी लिस्बनको इस्टाडियो डा लुजमा हुने खेलमा दर्शक हुने छैनन् र फ्रेञ्च महारथी पिएसजीले मार्चमा भएको प्रि–क्वार्टरफाइनलको दोश्रो लेगमा डर्टमण्डलाई हराउदा खाली रँगाशालामै खेलेको थियो ।
त्यो रात २–० ले हात पारेको जितमा नेमारले नै गाल गर्दा पिएसजीले पहिलो लेगको नतिजालाई उल्टाउएको थियो । खेलपछि नेमार पार्क डेस प्रिन्सेस रँगशालाको स्ट्याण्डमा गएर उभिदै खुशीले रोएका थिए । २ सय ६४ मिलियन डलरमा पेरिस आएपछिको दुई सिजन महत्वपूर्ण क्षणहरुमा चोटले पिरोलिएका नेमारलाई त्यो गोलको महत्व राम्ररी थाहा थियो ।
पहिलो पटक खुट्टाको हड्डी भाच्चिदा नेमारले २०१८ को च्याम्पियन्स लिग अन्तिम १६ को दोश्रो लेग गुमाउदा पिएसजीलाई रियन म्याड्रिडले नकआउट गरेको थियो । एक बर्षपछि इतिहास दोहोरिन पुग्दा नेमार त्यही चोटका कारण बाहिरिएपछि सामान्य प्रदर्शन गर्दै आइरहेको म्याचेस्टर युनाइटेडले पहिलो लेगमा २–० ले पछि रहेको स्थिति उल्टाउदै पिएसजीलाई घर पठाइदिएको थियो ।
त्यस यता सबैभन्दा बढी चर्चा पाएको उनको बार्सिलोना फर्कने कुरा पुरा हुन सकेको छैन भने कोरोना महामारीपछिको फुटबल बजारमा त्यो पुरा होला जस्तो पनि देखिदैन । नेमारले बुधबार एट्लान्टाबिरुद्ध खेलेको भोलिपल्ट उनी स्पेनबाट सबैभन्दा महँगा खेलाडीको रुपमा फ्रान्स आएको ठ्याक्कै तीन बर्ष पुरा हुनेछ ।
२८ बर्षिय नेमार अहिले पेरिसमा स्थापित भइसकेका छन् भने एट्लान्टाबिरुद्धको खेलमा टिमको नेतृत्व गर्नका लागि उत्कृष्ट लयमा देखिन्छन् । जित हात पारेको खण्डमा २०११ मा कतार स्पोर्ट्स इन्भेस्टभेन्ट्सले टेक ओभर गरे यता पहिलो पटक च्याम्पियन्स लिगको सेमिफाइनलमा प्रवेश गर्नेछ ।
म पेरिस आए यताकै सबैभन्दा राम्रो समयबाट गुज्रिरहेको छु, नेमारले गत साता क्लबको वेबसाइटलाई दिएको एक अन्तर्वार्तामा भनेका थिए ।
एमबाप्पे माथिको सस्पेन्स
एक हप्ता पछि आफ्नो स्थापनको गोल्डेन जुबिलि मनाउन गइरहेको पिएसजीका प्रशिक्षक थोमस टुचेलका लागि छनोटको लागि भने ठूलै टाउको दुखाइ रहेको छ । टुचेलका अर्का सुपरस्टार फर्वार्ड किलियन एमबाप्पे सेन्ट एटिनेबिरुद्धको फ्रेञ्च कप फाइनलका दौरान बोकेको गोलीगाँठोको चोटले बेञ्चमै रहने सम्भावना बढी रहेको छ ।
एमबाप्पे चोटग्रस्त रहेपनि उनलाई टुचेलले टिममा राखेका छन् । दोहोरो पहेलो कार्डका कारण एन्जल डि मारिया निलम्बनमा रहनेछन् भने सम्झौता समाप्त भएपछि क्लबका सर्वाधिक गोलकर्ता एडिन्सन काभानीले पनि जुनमै क्लब छोडिसकेका छन् । काभानीले लिस्बनमै पार्चुगिज च्याम्पियन बेन्फिकाको लागि सम्झौता गर्न गइरहेको बताइएको छ ।
टुचेलका लागि सबैभन्दा ठूलो चिन्ता भने क्लबका उत्कृष्ट मिडफिल्डर मार्को भेराट्टी साथमा नहुनु हो । भेराट्टी पिडुलाको चोटका कारण मैदान बाहिर रहेका छन् भने पिएसजी फाइनल पुगेपनि उनी उपस्थित हुन नसक्ने समाचार बाहिर आइहेको छ ।
जर्मन टुचेल आफैपनि बैशाखी टेक्दै हिडिरहेका छन् । व्यायाम गर्ने क्रममा उनले उनको खुट्टाको हड्डीमा चोट लाग्नुका साथै गोलीगाँठो पनि च्यात्तिएको छ ।
तर नेमार फिट रहुञ्जेल पिएसजी अर्को साता हुने सेमिफाइनलमा प्रवेश गर्नेमा आशावादी रहेको छ । सेमिफाइनल पुग्ने टोलीले स्पेनिस क्लब एट्लेटिको म्याड्रिड र जर्मन आरबी लाइपजिगबीचको अर्को क्वार्टर फाइनल बिजेताको सामना गर्नेछ ।
हामी एकै साथ हुँदा निकै उत्कृष्ट टिम हौं । यो सिजन हामीले चार वटा उपाधि जितिसकेका छौं र म यो क्लबको व्यवस्थापक हुन पाउदा निकै खुशी छु । यो मेरो लागि उपहार जस्तै हो, टुचेलले पिएसजी टिभिलाई भनेका थिए ।