काग्लियारीसँग युभेन्टस स्तब्ध भएको खेलमा गोल गर्न नसक्दा क्रिष्चियानो रोनाल्डोले युरोपको लिगमा यो सिजन सर्वाधिक स्कोरर बन्ने मौका गुमाएका छन् ।
बुधबार राति भएको खेलमा लगातार नवौं पटक उपाधि जितिसकेको १४ औं स्थानको काग्लियारीसँग २–० ले हार्यो सबैभन्दा फ्रस्ट्रेटेड रहे पोर्चुगिज सुपरस्टार रोनाल्डो । रोनाल्डोले यो सिजन उत्कृष्ट प्रदर्शन गर्दै ३१ गोल गरेका छन् र उनलाई इटालि मात्र नभई युरोपको शिर्ष पाँच लिगहरु मध्येकै सर्वाधिक स्कोर बन्ने मौका रहेको थियो ।
तर रोनाल्डो चुक्न पुगे ।
लुका गाग्लियानो र जियोभानी सिमियोनेको गोलको मद्दतमा काग्लियारीले सहज जित दर्ता गर्यो भने रोनाल्डो लाजियो स्ट्राइकर सिरो इमोबिलेभन्दा अझै चार गोलले पछि परेका छन् । इटालियन सिरी आ मा अन्तिम चरणको खेल मात्र बाकी रहेको अवस्थामा रोनाल्डो सामु अब ठूलै चुनौति तेर्सिएको छ ।
इमोबिलेले बुधबार नै भएको खेलमा ब्रेसियामाथि २–० को जित हात पार्ने क्रममा एक गोल गरेका थिए । इमोबिले अब युरोपमा यो सिजन सर्वाधिक गोलकर्ता रहने लगभग पक्का भएको छ । उनी बायर्न म्युनिखका पोलिस स्ट्राइकर रोबर्ट लेवान्डोस्कीभन्दा एक गोलले अगाडी रहेका छन् ।
इमोबिले सिरी आ इतिहासमा एकै सिजन सर्वाधिक गोल गर्ने गोन्जालो हिग्वेनको किर्तिमानबाट मात्र एक गोल पछाडी रहेका छन् । हिग्वेनले नापालीका लागि २०१५–१६ को सिजनमा ३६ गोल गरेका थिए ।
बुधबारको खेलमा जित हात पारेपछि लाजियो अंक तालिकामा एट्लान्टासँग ७८ अंकमा बराबरी गर्दै गोल अन्तरले मात्र चौथो स्थानमा रहेको छ । अर्को खेलमा एसि मिलानले साम्प्डोरियालाई ४–१ ले हरायो । लेचेले युडिनेजीलाई २–१ ले हराउदै रेलिगेसनको संघर्षलाई अन्तिम दिनसम्म लगेको छ ।
१८ औं स्थानमा रहेको लेचेको ३५ अंक रहेको छ भने रेलिगेसन जोनबाट एक स्थानमाथि रहेको जेनोआको ३६ अंक भएको छ । जेनोआ सासुलोसँग ५–० को फराकिलो अन्तरले पराजित हुन पुग्यो ।
