नेपालका लागि १३ औं दक्षिण एसियाली खेलकुद पुरुष फुटबलको स्वर्ण पदक बिजेता अभिषेक रिजाललाई भिजन कन्सर्न प्रा. लिले प्रायोजन गरेको छ ।
बुधबार एक कार्यक्रमकाबीच भिजन कन्सर्नले राष्ट्रिय टोलीका उदीयमान युवा खेलाडी अभिषेकलाई एक बर्षको लागि सम्झौता गरेको हो । लाजिम्पाट र बौद्धमा रहेको भिजन कन्सर्नले आखा परिक्षण र चस्मा बिक्रि बितरण गर्दै आईरहेको छ ।
सम्झौता पत्रमा अभिषेक र भिजन कन्सर्नका सञ्चालक कृष्ण पोखरेलले हस्ताक्षर गरे । सम्झौता अनुसार भिजन कन्सर्नले एक बर्षका लागि अभिषेकको निशुल्क आखा परिक्षण गर्नेछ । यस्तै आवश्यक्ता अनुसार आखाका लागि आवश्यक सामग्रीहरु पनि उपलब्ध गराउने छ । सम्झौता रकम भने गोप्य राखिएको छ ।
शहीद स्मारक ए डिभिजन लिग च्याम्पियन मछिन्द्र क्लबमा आबद्ध अभिषेकले भिजन कन्सर्नसँग जोडिदा निकै खुसी रहेको र आफुलाई यसले झनै प्रोत्साहन गर्ने बताए । “चस्मा सम्बन्धित कम्पनीसँग जोडिन पाँउदा निकै खुसी छु । यसले आगामी दिनमा झनै प्रोत्साहन गर्नेछ,” एन्फा एकेडेमी उत्पादन अभिषेकले भने ।
सम्झौता लगत्तै भिजन कन्सर्नले अभिषेकको पुर्ण आखा चेकअप पनि गरेको थियो । अभिषेकले गत बर्ष मलेसिया भ्रमणमा राष्ट्रिय टिमबाट डेब्यु गरेका थिए । दोस्रो खेलमै चाईनिज ताईपेविरुद्ध गोल गर्दै रिजालले राष्ट्रिय टिममा आफुलाई स्थापित गरेका हुन् ।
अभिषेक एसियाली फुटबल महासंघ (एएफसी) ले आयोजना गर्ने क्लब स्तरिय एएफसी कपमा गोल गर्ने पहिलो नेपाली खेलाडी समेत हुन् । उनले कीर्तिमानी आठौं पटक लिग च्याम्पियन मनाङ मस्र्याङ्दीबाट भारतको मिनेर्वा पञ्जाव (हाल पञ्जाब एफसी) विरुद्ध गोल गरेका थिए ।
भिजन कन्सर्नका सञ्चालक पोखरेलले राष्ट्रिय खेलाडी अभिषेकसँग जोडिन पाउँदा आफुहरु निकै गौरवान्वित भएको र आगामी दिनमा पनि सहकार्य गर्दै अघि बढ्ने बताए ।
