पुर्व सदस्य सचिव रमेश कुमार सिल्वालसहित तीन जनालाई युवा तथा खेलकुद मन्त्रालयले राष्ट्रिय खेलकुद परिषदको सदस्य सचिवका लागि अन्तिम तीन जनाको नाम सिफारिस गरेको छ ।
खेलकुदमा नयाँ ऐन लागु भएपछि नेपाली खेलकुदको सरकारी स्तरमा प्रशासकीय परिर्वतन हुने निश्चित भएसँगै सिल्वालले राजीनामा गर्दै बसेका थिए । नयाँ सदस्य सचिवको लागि २७ जनाको आवेदन परेको थियो भने त्यसमा दुई जना यसअघि नै अयोग्य भइसकेका थिए ।
अन्य २५ जनाबाट युवा तथा खेलकुद मन्त्रालयका सचिव राम थपलियाको संयोजकत्वमा गठित समितिले अन्तिम तीन जनालाई छनोट गर्दै खेलकुद मन्त्री जगद बहादुर सुनार बिश्वकर्मालाई बुझाएको हो । अन्य दुई जनामा नेपाल भलिबल संघका उपाध्यक्ष लिल बहादुर थापा र पुर्व राष्ट्रिय महिला भलिबल टोलीकी कप्तान अन्जु श्रेष्ठ रहेका छन् ।
मन्त्रालयले अब सिफारिस भएका तीन जनाको नाम मन्त्री परिषदमा पेश गर्नेछ र त्यसपछि एक जना सदस्य सचिव नियुक्त गरिनेछ । स्रोतका अनुसार एक बर्ष पुरानै संरचनामा सदस्य सचिव रहेका सिल्वाल मुख्य दावेदारको रुपमा रहेका छन । उनी नियुक्त भएको खण्डमा चारको ठाँउमा पाँच बर्ष नेपाली खेलुकदको सदस्य सचिवको रुपमा रहनेछन् ।
प्रधानमन्त्री केपी ओली निकटका सिल्वाल नयाँ ऐन लागु भएपछि स्वत पदमुक्त भएका थिए । नयाँ ऐन अनुरुप भने यसअघि खेलकुदकमा पूर्ण नियन्त्रण रहने गरेको सदस्य सचिवको अधिकारमा ७५ प्रतिशत कटौति भएको छ । सदस्य सचिवले प्रयोग गर्दै आएको अधिकार अब सात सदस्यीय कार्यकारी समितिले प्रयोग गर्नेछ ।
ऐनमा सदस्य सचिव बन्नको लागि नेपाली नागरिक, स्नातक तह उत्तीर्ण, खेलकुदको क्षेत्रमा पाँच वर्ष काम गरेको, प्रचलित कानुनले अयोग्य नभएको र ३० वर्ष पुरा भएको पाँच योग्यता तोकेको छ ।
राष्ट्रिय खेलकुद परिषदको इतिहासमा पहिलो पटक आवेदन दिएर सदस्य सचिवको चयन हुन लागेको हो ।