पहिलो लेगमा रियल म्याड्रिडमाथि प्राप्त अग्रतालाई बचाई राख्ने हो भने म्यानचेस्टर सिटीले च्याम्पियन्स लिगको क्वार्टर फाइनलमा फ्रेञ्च क्लब लियोन अथवा इटालियन च्याम्पियन युभेन्टसको सामना गर्ने भएको छ ।
जुरिचमा शुक्रबार भएको क्वार्टर फाइनल ड्रमा सिटी र रियलको प्रतिद्वन्दी निश्चित भएको हो । सिटीले रियललाई पहिलो लेगमा २–१ ले हराएको थियो । बायर्न म्युनिखसँग स्ट्यामफोर्ड ब्रिजमा ३–० ले पछि परेको चेल्सीले बार्सिलोना वा नापोलीको सामना गर्नेछ । तर त्यसअघि चेल्सीले अलायन्ज अरिनामा बायर्नको ठूले अग्रतालाई उल्टाउनु पर्नेछ ।
आ–आफ्नो दोश्रो लेगमा सोचे अनुरुप नतिजा निकाल्दै क्वार्टर फाइनलमा पनि जित हात पार्ने हो भने चेल्सी र सिटी सेमिफाइनलमा भिड्नेछन् । सिटी र जर्मन बुन्डेसलिगा च्याम्पियन च्याम्पियन्स लिगको प्रबल दाबेदारको रुपमा रहेका छन् ।
डिफेन्डिङ्ग च्याम्पियन र नयाँ प्रिमियर लिग बिजेता लिभरपुललाई नक आउट गरेको एट्लेटिको म्याड्रिडले अन्तिम ८ मा जर्मनीको आरबी लाइपजिगसँग खेल्नेछ । सबै प्रतियोगिता गरेर पछिल्लो ११ खेलमा जित हात पार्दै आएको इटालियन टोली एट्लान्टाले फ्रेञ्च लिग वान च्याम्पियन पेरिस सेन्ट जर्माइनको सामना गर्नेछ ।
कोरोना भाइरस महामारीका कारण फ्रान्समा फुटबल ठप्प भएसँगै लिग वान पनि रद्द भएका कारण पिएसजीले मार्च ११ देखि प्रतिस्पर्धात्मक फुटबल खेलेको छैन ।
कोरोनाकै कारण रोकिएको च्याम्पियन्स लिगका प्रि क्वार्टर फाइनलहरु अगष्ट ७ र ८ मा हुनेछ भने क्वार्टरफाइनल खेल अगष्ट १२ देखि १५ सम्म सञ्चालन हुनेछन् । अब सबै नकआउट चरणमा एक लेग मात्र हुनेछ । क्वार्टर फाइनलदेखि फाइनलसम्मका खेलहरु अगष्ट १२ देखि २३ सम्म पोर्चुगलमा हुनेछन् ।
