इङ्गलिस प्रिमियर लिगले बिहिबार भएका तीन वटै खेलमा भिडियो असिस्टेन्ट रेफ्रि (भार) बाट पेनाल्टीमा गलत निर्णय आएको स्विकार गरेको छ ।
म्यानचेस्टर युनाइटेडले एस्टन भिल्लालाई ३–० ले हराउदा ब्रुनो फर्नान्डेजले पेनाल्टीमा गोल गरेका थिए । जेम्स वार्ड ब्राउजको बिवादास्पद पेनाल्टी बारमा लाग्दा साउथ्याम्प्टनले एभर्टनसँग १–१ गोलको बराबरी खेलेको थियो भने ह्यारि केनमाथि भएको फउलले पेनाल्टी नपाउदा टोटेन्ह्याम हट्स्पर बर्नमाउथसँग गोलरहित बराबरीमा रोकिन पुग्यो ।
सबै खेलको समाप्तिपछि प्रिमियर लिगले युनाइटेड र साउथ्याम्प्टनले पेनाल्टी पाउन नपर्ने र स्पर्सले भने पेनाल्टी पाउनु पर्ने स्पष्ट पारेको छ । पुर्व एभर्टन खेलाडी टिम काहिलले भारले काम गर्नका लागि पुर्व खेलाडीको सहयोग लिनुपर्ने बताएका छन् ।
“मलाई लाग्छ पुर्व खेलाडीसँगै हुँदा उनीहरु (भार) म्याचमा आएका मोडहरुको बारे स्पष्ट हुनेछन् । पेनाल्टी पाउनका लागि ढलिदिदा खेलाडीहरुले बुझ्न सक्छन् । यसको लागि भारलाई खेलाडीकै सुझाव आवश्यक रहन्छ,” पुर्व अष्ट्रेलियन फुटबलर काहिलले भने ।
टोटेन्ह्यामका व्यवस्थाक होजे माउरिन्होले संसारका सबै लाई त्यो पेनाल्टी थियो लागेको थियो तर भिडियो असिस्टेन्ट रेफ्रि माइकल ओलिभरलाई भने त्यस्तो नलागेको बताए । डिफेन्ड गर्ने क्रममा बर्नमाउथका जोसुवा किँगले केनलाई डि एरियाभित्र धकेलेका थिए र रेफ्रि पउल टियर्नीले पेनाल्टी दिएनन् । ओलिभरले पनि टियर्नीलाई चेक गर्नका लागि खेल रोक्न भनेका थिएनन् ।
बिहिबार युनाइटेडको सहज जितमा फर्नान्डेजको २७ औं मिनेटको बिवादास्पद पेनाल्टीपछि मेसन ग्रिनउड र पउल पोग्बाले पनि गोल गरेका थिए । फर्नान्डेजले बल माथि आक्रमण गर्दा लडेपनि उनले भिल्ला डिफेन्डर एज्री कोन्साको खुट्टा तानेको देखिन्थ्यो ।
युनाइटेड अंक तालिकामा ५८ अंक सहित पाचौं स्थानमा कायमै रहेको छ र च्याम्पियन्सको लिगको दाबेदारी अझै रहेको छ ।
बराबरीपछि टोटेन्ह्याम भने सातौं स्थानमा उक्लन चुकेको छ । टोटेन्ह्यामको ४९ अंक छ भने बिहिबार जित हात पारेको भए उ सेफिल्ड युनाइटेडलाई ५१ अंकका साथ गोल अन्तरको आधारमा पछि पार्ने थियो । ३४ औं चरणका खेलहरु समाप्त हुँदा एभर्टन ११ औं र साउथ्याम्प्टन १२ औं स्थानमा रहेका छन् ।