सर्जियो रामोसको एक मात्र गोलको मद्दतमा रियल म्याड्रिड गेटाफेमाथि १–० को कठिन जित हात पार्दै स्पेनिस ला लिगामा चार अंकको स्पष्ट अग्रता बनाउन सफल भएको छ ।
लगातारको आक्रमण बिफल पार्दै आएपछि हतोत्साहित बनेको रियलले ७९ औं मिनेटमा ड्यानी कार्भाहालमाथि फउल भएपछि पेनाल्टी पाएको थियो । रामोसले त्यसलाई गोलमा परिणत गरेका थिए । रामोसले रियलका लागि लगातार २१ पेनाल्टीमा गोल गरेका छन् ।
च्याम्पियन्स लिगको स्थानका लागि दाबेदारीमा रहेको गेटाफेले राम्रो आक्रमण बुन्दै गोल गर्ने प्रयास गरेपनि रियल गोलकिपर थिबाउ कोर्ट्वाले तीन राम्रो बचाउ गरेका थिए । शारिरिक लडाइ जस्तो देखिएको डर्बि खेलमा १० खेलाडीले पहेलो कार्ड पाएका थिए ।
रियलले दोश्रो स्थानको बार्सिलोनासँग अब चार अंकको स्पष्ट अग्रता बनाएको छ । पाँच खेल बाकी रहेको स्थितिमा रियलको ७४ अंक रहेको छ र अब चार खेलमा जित हात पारेको खण्डमा २०१२ पछि पहिलो पटक ला लिगाको उपाधि जित्नेछ ।
अंक बराबर रहेको स्थितिमा बार्सिलोना लगातार दुई खेलमा बराबरीमा रोकिएपछि रियले स्पष्ट अग्रता लिने मौका पाएको थियो । गेटाफे ५२ अंकका साथ छैटौं स्थानमा रहेको छ ।
बिहिबार नै भएको अन्य खेलमा ओसासुनाले आइबारलाई २–० ले हरायो भने रियल सोसिडाडले इस्पान्योललाई २–१ ले पराजित गर्यो ।
