दक्षिण अफ्रिकाका पुर्व कप्तान एबि डिभिलियर्सले २०१५ को बिश्वकप सेमिफाइनलमा न्युजिल्याण्डसँग बेहोरेको हारले आफूले लिएको सन्यासको निर्णयमा मुख्य भुमिका खेलेको खुलासा गरेका छन् ।
अष्ट्रेलिया र न्युजिल्याण्डमा भएको बिश्वकपको बर्षाले प्रभावित सेमिफाइलमा दक्षिण अफ्रिका डकवर्थ लेविस नियमका आधारमा पराजित भएपछि पुरै दक्षिण अफ्रिकी टिम नै स्तब्ध बनेको थियो । ग्राण्ट इलियटले आफ्नो क्रिकेटिङ्ग करिअरकै उत्कृष्ट इनिङ्गस खेल्दै नटआउट ८८ रन बनाएपछि दक्षिण अफ्रिका चार विकेटले पराजित हुँदा डि भिलियर्स र तिब्र गतिका बलर मोर्नि मोर्केल रोएका थिए ।
उक्त सनसनीपूर्ण पराजयबाट फर्किन डि भिलियर्सले एक बर्षसम्म संघर्ष गरेको पनि बताएका छन् । “मलाई त्यसले (न्युजिल्याण्डसँगको हार) लामो समय पोलि रह्यो । तर म खेलिरहे, हार पचाउन कोशिष गरिरहे । म निकै राम्रो ब्याटिङ्ग गरिरहेको थिए,” प्रख्यात कमेन्टेटर हर्षा भोग्लेसँगको एक अन्तर्वार्ताका क्रममा डि भिलियर्सले भने ।
सदबहार उत्कृष्ट ब्याट्स्म्यानको रुपमा कहलिएका डि भिलियर्सले उत्कृष्ट फर्ममा रहदै २०१९ को बिश्वकपको एक बर्ष अघि सन्यास घोषणा गरेपछि बिश्व क्रिकेट नै चकित भएको थियो । उनको अनुपस्थितिमा दक्षिण अफ्रिका इङ्गल्याण्डमा भएको बिश्वकपमा निकै खराब प्रदर्शन गर्दै सेमिफाइनल समेत प्रवेश गर्न असफल रहेको थियो ।
अप्रत्याशित सन्यास घोषणा गर्ने क्रममा डि भिलियर्सले आफू थकित भएको र प्रतिस्पर्धा गर्न असक्षम रहेको बताएका थिए । तर अहिले आएर डि भिलियर्सले २०१५ को पराजयले त्यो निर्णयमा मुख्य भुमिका खेलेको बताएका हुन् ।
“व्यक्तिगत रुपमा हेर्ने हो भने सेमिफाइनलको पराजयले ठूलो भुमिका खेलेको थियो,” ११४ टेस्टमा ८ हजार ७ सय ६४ र २२८ एकदिवसीय अन्तर्राष्ट्रियमा ९ हजार ५ सय ७७ रन बनाएका डि भिलियर्सले भने । “त्यो रात हामी खेलसँगै हार्न पुगेका थियौं । शायद यो खेलको सुन्दर पक्ष थियो तर त्यो पुरै बर्ष मलाई त्यो हार पचाउन निकै कठिन भएको थियो । मलाई केही महिनापछि फेरि टिममा घुलमिल भएर खेलमा फर्किन पनि एकदम गाह्रो लागिरहेको थियो ।”
“जब क्रिकेट सुचारु गर्नु पर्ने भयो मैले आफैलाई भने एकछिन म त बिश्वकपको हारबाटै बाहिर आउन सकिरहेको छैन । म निकै बिक्षिप्त थिए । हो म संवेदनशील छु र यस्ता कुराहरुले म कस्तो महसुस गर्छु र लक्ष्य के लिन्छु भन्नेमा ठूलो भुमिका खेल्ने गर्छ, डि भिलियर्सले सम्झिए ।
“आफ्नो मनोभावन अरुलाई बाड्न नसक्दा डि भिलियर्सलाई पछुतो पनि छ । मेरो लागि अर्को १२ महिना कठिन थियो । म इमान्दार हुदै मैले यस बिषयमा अरुसँग कुरा गर्नुपर्ने थियो । मलाई त्यो समय म एक्लै छु भन्ने भयो तर यो नचाहिने कुरा थियो । मद्दत नै नमागी, कुरा नै नगरि म एक्लो थिए भन्नु तर्कसम्मत छैन।”