एक सम्झौता जसले निराश म्यानचेस्टर युनाइटेडलाई नै बदलिदियो

ब्रुनो फर्नान्डेस म्यानचेस्टर युनाइटेड आउदा उनी यस्तो टिममा जोडिन पुगेका थिए जसको फ्यानले घरेलु मैदानमै बर्नलीसँग पराजित भएपछि आफ्ने खेलाडीहरुलाई धिक्कारेका थिए । सात इङ्गलिस प्रिमियर लिग म्याचमा चौथो हार बेहोर्दा युनाइटेड सिजनकै सबैभन्दा तल्लो स्तरमा खस्किन पुगेको थियो ।

ओल्ड ट्राफोर्डको वातावरणलाई बिषाक्त भनिएको थियो भने टिमको प्रदर्शन लाजमर्दो । जनवरी २२ को त्यो परिणामपछि युनाइटेडको टोली ३० बर्षकै सबैभन्दा खत्तम भएको समेत बताउन थालिएको थियो ।

एक सम्झौतापछि युनाइटेड भने परिवर्तित क्लब भएको छ । फर्नान्डेसको आगमनपछि भएका ८ इङ्गलिस प्रिमियर लिग खेलमा युनाइटेड फर्ममा रहेको टिम हुन पुगेको छ भने क्लबमा रहेको कालो बादल पनि बिस्तारै हट्दै जान थालेको छ ।

ओले गुनर सोल्सायरको नेतृत्वमा युनाइटेडले जीवंत र रेशमी फुटबल खेल्दा फर्नान्डेस त्यसको मुटुमा रहने गरेका छन् । ब्राइटनलाई मङ्गलबार ३–० ले हराउदा पोर्चुगलका २५ बर्षिय फर्नान्डेसले तीन गोल गर्दै युनाइटेडलाई अर्को सिजनको च्याम्पियन्स लिगको छनोटमा कायमै राखेका थिए ।

पुर्व स्पोर्टिङ्ग लिस्बन एट्याकिङ्ग मिडफिल्डरले मैदानमा ६४ मिनेट बिताउदा उत्कृष्ट लयमा देखिन्थे । उनले पउल पोग्बासँग उत्कृष्ट तालमेल गरिरहेका थिए भने तीन पटक ट्याकल गर्दै दुई पटक पोजेसन खोस्दा रक्षात्मक खेलाडीको रुपमा पनि आफू उत्कृष्ट रहेको साबित गरेका थिए ।

“फर्नान्डेसले अर्को १० मिनेट खेलेको भए मैले उनलाई म्यान अफ द म्याचको पुरस्कार दिन्थे,” पुर्व इङ्गल्याण्ड खेलाडी करेन कार्निले बिबिसी रेडियो फाइभलाई भने । “अत्यन्तै सुन्दर खेलेका फर्नान्डेजलाई खेलेको हेर्न पाउनु पनि अहोभाग्य हो । उनले युनाइटेडमा ल्याएको फरक निकै अतुलनीय छ । म्यानचेस्टर युनाइटेडलाई अर्को सेन्टर फर्वार्ड चाहिएको होला तर अहिलेको मिडफिल्ड उत्कृष्ट देखिन्छ । उनले मैदान छोड्दा मलाई निकै नराम्रो लागेको थियो ।”

फर्नान्डेजले सबै प्रतियोगिता गरेर खेलेका १२ खेलहरुमा युनाइटेडले ८ मा जित हात पार्दै चारमा बराबरी गरेको छ । यस क्रममा रेड डेभिल्सले २८ गोल गरेको छ भने चार गोल मात्र खाएको छ ।

फेब्रवरीमा युनाइटेडका लागि डेब्यु गरेयता फर्नान्डेस अन्य कुनै पनि प्रिमियर लिग खेलाडी भन्दा बढी गोलमा संलग्न छन् । उनले ६ गोल गर्दै चार असिस्ट गरिसकेका छन् । युनाइटेड चौथो स्थानमा रहेको चेल्सीभन्दा दुई र तेश्रोमा रहेको लेस्टरभन्दा मात्र तीन अंकले पछाडी रहेको छ । लेस्टरसँग लिगको अन्तिम दिन खेल्ने भएकाले त्यो खेल च्याम्पियन्स लिगको टिकट काट्नका लागि गर या मर स्थितिको खेल पनि बन्न सक्छ ।

युएफाले म्यानचेस्टर युनाइटेडमाथि युरोपियन प्रतियोगिताहरुमा लगाएको प्रतिबन्धलाई जुलाई १४ को दिन कायमै राखेको स्थितिमा पाचौं स्थान पनि च्याम्पियन्स लिग पुग्नका लागि पर्याप्त हुनेछ । हामी च्याम्पियन्स लिगमा छानिनको लागि लडिरहेका छौं र मलाई लाग्छ हामी यसमा सफल पनि हुनेछौं, फर्नान्डेसले भने ।

बर्नलीसँग जनवरीमा हारेपछि निकै दवाबमा रहेका सोल्सायरले आफ्नो टोली राम्रो नभएको र आइडिया बिहिन भएको बताएका थिए । तर ब्राइटनबिरुद्धको शान्दार जितपछि भने उनको बोली फेरिएको छ ।

“उत्कृष्ट खेलिरहेकाले उनीहरु (आफ्ना खेलाडीहरु) आत्मबिश्वासी हुनु यथार्थपरक नै छ । अहिले टोलीमा राम्रो क्वालिटी देखिएको छ, खेलाडीहरु फिट छन् र प्रतिस्पर्धा गर्नका लागि राम्रा स्थानहरु पनि छन् । अहिले एक भन्दा बढी खेलमा प्रभाव पार्ने खेलाडी छन्, केही उत्कृष्ट खेलाडीहरु छन्, ब्रुनो आएका छन् र उत्कृष्ट खेल देखाएका छन् । उनले टिममा जितको मानसिकता पैदा गरेका छन् । उनीहरुले यसरी खेलेको हेर्न पनि साह्रै आनन्द आइरहेको छ,” सोल्सायरले भने ।