म्यानचेस्टर युनाइटेडलाई उछिन्दै पाचौं स्थानमा उक्लिएपछि उल्भरह्याम्प्टन मिडफिल्डर लिएण्डर डेनडंकरले इङ्गलिस प्रिमियर लिगको पहिलो चौथो स्थानको सपना देख्नु राम्रो रहेको बताएका छन् ।
डेनडंकरकै गोलको मद्दतमा उल्भ्सले शनिबारको खेलमा रेलिगेसनबाट बच्न संघर्ष गरिरहेको एस्टन भिल्लालाई १–० ले हरायो । जितपछि उल्भ्स ५२ अंक साथ पाचौं स्थानमा उक्लिएपनि ४९ अंक रहेको युनाइटेड भन्दा एक खेल बढी खेलेको छ । युनाइटेड जुलाई १ को खेलमा ब्राइटनलाई पराजित गर्न सके गोल अन्तरको आधारमा पुनः चौथो मै उक्लिनेछ ।
तेश्रो देखि पाचौं स्थान सम्मको भविष्य निर्धारण भने एक जित, बराबर वा एक हारले पनि गर्न सक्ने स्थिति रहेको छ । लेस्टर सिटी ५५ अंक साथ तेश्रोमा रहेको छ भने चेल्सी (५४) चौथोमा रहेको छ । यी दुवै टोली आइतबार एक महत्वपूर्ण खेलमा भिड्न गइरहेका छन् ।
म्यानचेस्ट सिटीलाई युरोपियन प्रतियोगिताहरुको प्रतिस्पर्धामा प्रतिबन्ध लागेका कारण प्रिमियर लिगमा यो सिजन पाचौं स्थानसम्म महत्वपूर्ण रहेको छ ।
“सबैजनाले सपना देख्छन् तर हामी यथार्थपरक हुन आवश्यक छ । हामीले केही निकै कठिन खेलहरु खेल्न बाकी रहेको छ तर लगातार तीन खेल जितेर ९ अंक बटुल्दा निकै राम्रो महसुस हुने गर्छ । अब हामीले अन्य खेलमा सकेसम्म राम्रो दिन आवश्यक छ,” डेनडंकरले भने ।
खेलमा मात्र दुई पोस्ट प्रहार गरेको उल्भ्सका लागि डेनडंकर दोश्रोमा भने सफल भएका थिए । बराबरीले भिल्ला रेलिगेसन जोनबाट बाहि निस्कने थियो तर खेल अवधिभर उसले मात्र एक आक्रमण बुन्न सकेको थियो ।
