बोरुसिया डर्टमण्ड तथा बिश्व फुटबलका उदीयमान फुटबलर एर्लिङ ब्रुट हालान्डले अर्को सिजन जर्मन बुन्डेसलिगमा बायर्न म्युनिखको राज समाप्त गर्न आफू आतुर रहेको बताएका छन् ।
आफू सधै दोश्रो हुन नचाहेको बताएका हालान्डले शनिबार बुन्डेसलिगाका अन्तिम चरणका खेलहरु समाप्त हुदा बायर्नले लगातार आठौं पटक बुन्डसेलिगाको उपाधि उचालेको हेर्नेछन् । डर्टमन्ड भने लगातार दोश्रो बर्ष दोश्रो स्थानमै जर्मनीको टप डिभिजन लिग सक्काउनेछ ।
बर्षको शुरुवातमा आरबी साल्जबर्गबाट डर्टमण्ड आए यता १९ बर्षिय हालान्डले खेलेका १७ लिग खेलमा १६ गोल गरेका छन् । यो सिजन साल्जबर्ग र डर्टमण्डका लागि संयुक्त रुपमा खेलिएका ३९ खेलमा उनले ४४ गोल गरेका छन् । डर्टमण्ड डिफेण्डर म्याच हमेल्सले अर्को सिजन एक स्थान माथि सक्काउने लक्ष्य लिएको बताउदै गर्दा हालान्डले पनि आफ्नो लक्ष्य उपाधि रहेको बताएका छन् ।
“म डर्टमण्डसँग केही हासिल गर्न चाहन्छु, हरेक पटक दोश्रो नहुदै उपाधिहरु नै जित्न चाहन्छु,” होफेन्हाइमबिरुद्ध शनिबार हुने अन्तिम लिग खेल अघि हालान्डले भने । “हामीले आफ्नै लागि लक्ष्य तैयार पार्दै आक्रमण गर्नुपर्छ ।”
सन् २०११ र २०१२ मा बायर्न चुक्दा योगर्न क्लोपले डर्टमण्डलाई लगातार दुई सिजन बुन्डेसलिगाको उपाधि जिताएका थिए । उत्कृष्ट लयलाई कायम राख्दै लगातार गोल गरेका हालान्डलाई युरोपका अन्य उत्कृष्ट क्लबहरुले आखा लगाइरहेका छन् तर उनी २०२४ सम्म डर्टमण्डमा रहेको सम्झौताको सम्मान गर्न चाहन्छन् ।
“म भविष्यको बारे धेरै सोच्न चाहन्न । म वर्तमानमा जिउने मान्छे हो । त्यसैले मैले यो जाडोमा डर्टमण्डसँग जोडिने निर्णय लिएको थिए । डर्टमण्ड बिश्वकै ठूलो क्लबहरुमध्ये एक हो र मैले यहा लामो बसाइको लागि सम्झौतामा हस्ताक्षर गरेको छु,” हालान्डले भने ।
