इङ्गलिस प्रिमियर लिग अन्तर्गत म्यानचेस्टर सिटीबिरुद्धको खेलमा समर्थकहरुले ह्वाइट लाइभ्स म्याटर लेखेको ब्यानर प्लेनबाट इतिहाद स्टेडियममाथि बाट लगेपछि बर्नलीले आफू निकै लज्जित भएको बर्नलीले जनाएको छ ।
सोमबार फिल फोडेन र रियाद माह्रेजले दुई–दुई गोल गरेपछि बर्नली ५–० को फराकिलो अन्तरले पराजित भएको थियो । तर सिटीको फराकिलो अन्तरको जित भन्दा पनि आकाशमा उडाइएको ब्यानरले सबैको ध्यानाकर्षण गरेको थियो ।
अमेरिकाको मिनियापोलिस शहरमा मे २५ मा ४६ बर्षिय अश्वेत नागरिक जर्ज फ्लोएडको मृत्यु भए यता बिश्वभर नै रँगभेदको बिरोधमा ब्ल्याक लाइभ्स म्याटर नारा फैलिदै आएको छ । यसको समर्थनमा बिश्व खेलकुदका सबै लिग, प्रतियोगिता र खेलाडीहरुले प्रदर्शन गर्दै आइरहेका छन् । सोमबार पनि सिटी र बर्नलीका खेलाडी र स्टाफहरुले यसको समर्थनमा खेल शुरु हुनुअघि घुडा टेकेका थिए ।
“यस्ता समर्थकहरुले फुटबल डिजर्भ गर्दैनन्, बर्नलीका कप्तान बेन मीले भने । “हामी निकै लज्जित भएको छौं । उनीहरु हाम्रो अल्पमतका समर्थकहरु हुन् । हामी यस्तो कार्यलाई कहिल्यै पनि समर्थन गर्दैनौं । हामीलाई आकाशमा हेर्दा यसले निकै नराम्रो असर गरेको थियो ।”
बर्नलीले एक बिज्ञप्ति निकाल्दै उक्त ब्यानरले क्लबको अडानलाई प्रतिबिम्बित नगरेको बतायो । “बर्नली यस्तो घट्नाको घोर भत्सर्ना गर्दछ । हामी प्रिमियर लिग, म्यानचेस्टर सिटी र ब्ल्याक लाइभ्स म्याटर आन्दोलनलाई प्रबद्र्धन गर्दै आइरहेकाहरु सँग माफि माग्न चाहन्छौं,” बर्नलीले भनेको छ । “यसमा जिम्मेवारहरुलाई हामी टर्फ मुर (बर्नलीको घरेलु मैदान) मा हामी स्वागत गर्दैनौं ।”
बर्नली र सिटीले आफ्नो जर्सी पछाडी खेलाडीको नामको सट्टा ह्यास ट्याग ह्वाइट लाइभ्स म्याटर लेखेको जर्सी लगाएका थिए । आन्दोलनको समर्थनमा प्रिमियर लिगले कोरोना भाइरसपछि प्रतियोगिता सुचारु हुनुअघि नै यो योजना बनाएको थियो ।
म्यानचेस्टर सिटीका व्यवस्थापक पेप ग्वार्डियोलाले ४ सय बर्षदेखि कायम रहदै आएको सामाजिक भेदभाव एकै हप्तामा अन्त्य नहुने भन्दै भनेः “हामी स्थितिलाई परिवर्तन गर्नेछौं । हामीलाई समय चाहिन्छ । रँगभेद अझै पनि छ । हामीले हरेक दिन लड्दै यसको भत्सर्ना गर्न जरुरी छ ।”
