करिम बेन्जेमाले क्लबको सर्वाधिक पाचौं गोलकर्ता बनेपछि रियल म्याड्रिडले स्पेनिस ला लिगामा भ्यालेन्सियालाई ३–० को फराकिलो अन्तरले पराजित गर्दै शिर्ष स्थानको बार्सिलोनासँग दुरी छोट्याएको छ ।
बेन्जेमाले दुई गोल गर्दा उनले फेसेन्ज पुस्कासको गोलसंख्यालाई उछिनेका हुन् । ३२ बर्षिय फ्रेञ्च फर्वार्ड बेन्जेमाले रियलका लागि २ सय ४३ गोल गरिसकेका छन् । होम खेलमा एडेन हजार्डले दिएको पासलाई गोलमा परिणत गर्दै बेन्जेमाले रियललाई ६९ औं मिनेटमा अग्रता दिलाएका थिए ।
पाँच मिनेटपछि नै सब्स्टिच्युट मार्को एसेन्सियोले मैदान छिरेपछिको आफ्नो पहिलो टचमै गोल गर्दा रियलले २–० को अग्रता बनाएको थियो । ८६ औं मिनेटमा उत्कृष्ट भलिमार्फत दर्शनीय गोल गर्दै बेन्जेमाले रियललाई सहज जित दिलाएका थिए । दोश्रो गोल यति दर्शनीय थियो कि प्रशिक्षक जिनेदिन जिदानले समेत आश्चर्य मान्दै हात आफ्नो टाउकोमा राख्दै हासेका थिए । एसेन्सियोले नै दौश्रो गोलका लागि असिस्ट गरेका थिए ।
घुँडाको चोटका कारण सिजनको धेरै खेल गुमाएको एसेन्सियोले पनि फेल्र्याण्ड मेन्डीको क्रसमा भलिमार्फत गोल गरेका थिए । तर बेन्जेमाको भलि भने गोल अफ द सिजनको दाबेदार नै बन्न पुगेको छ । भ्यालेन्सियका लागि रोद्रिगोले गोल गरेपनि भिडियो असिस्टेन्ट रेफ्रिमार्फत त्यसलाई अफसाइड दिइएको थियो ।
अंक तालिकामा रियलको ६२ र बार्सिलोनाको ६४ अंक रहेको छ । भ्यालेन्सिया ४३ अंकका साथ आठौं स्थानमा रहेको छ । अर्को खेलमा आल्भेसले रियल सोसिडाडलाई २–० ले हरायो । आल्भेस १२ औं र सोसिडाड छैटौं स्थानमा रहेको छ । ला लिगमा २९ चरणका खेलहरु समाप्त भइसकेका छन् ।
