स्टार फुटबलर क्रिष्चियानो रोनाल्डोले पनि आफ्नो खेल जीवनको अन्त्य अमेरिकन टप डिभिजन फुटबल मेजर लिग सकर (एमएलएस) बाट गर्ने भएका छन् ।
रोनाल्डोले आफैले भने यस बिषयमा आधिकारिक रुपमा बताएका भने होइनन् । रोनाल्डोका पोर्चुगल र पुर्व म्यानचेस्टर युनाइटेडका साथी नानीले उनी अमेरिकामा खेल्ने खुलाशा गरेका हुन् । नानीका अनुसार रोनाल्डोले केहि समय अघि उनलाई आफ्नो खेल जीवनको अन्त्य एमएलएसबाट गर्ने इच्छा ब्यक्त गरेको बताएका हुन् ।
इङ्गल्यान्डका पुर्व कप्तान डेभिड बेक्ह्याम, वेन रुनी, स्विडेनका ज्लाटान इब्राहिमोबिच, फ्रान्सका थियरी हेन्री र स्पेनका डेभिड भिल्ला जस्ता चर्चित फुटबलरहरुले पनि एमएलएसमा खेलेका थिए ।
एमएलएस टोली ओर्लान्डो सिटी सकर क्लबका विंगर नानीले दुई बर्ष पहिले रोनाल्डोले एमएलएसमा खेल्ने बताएको जनाए । उनले भनेः “दुई बर्ष पहिले रोनाल्डोले आफ्नो खेल जीवनको अन्त्य अमेरिकामा गर्ने मलाई बताएका थिए । सम्भवत यो शत प्रतिशत हो । किनकी त्यहा खेल्ने उनको सम्भावना उच्च छ ।”
त्यस्तै एमएलएस टोली इन्टर मायामीका मालिक तथा फुटबलर बेक्ह्यामले पनि आफ्नो क्लबमा ३५ बर्षिय रोनाल्डो र ३२ बर्षिय लियोनेल मेस्सी जस्ता खेलाडीलाई पनि एमएलएसमा खेलाउने इच्छा ब्यक्त गर्दै आएका छन् । रोनाल्डो हाल इटालियन सिरी आ क्लब युभेन्टसमा छन् भने उनको सम्झौता सन् २०२२ को सिजनको अन्त्यसँगै सक्किनेछ ।
त्यस समय रोनाल्डो ३७ बर्षको हुनेछन् । जसका कारण पनि उनी अमेरिका जानसक्ने अनुमान लगाउन सकिन्छ । तर सन् २०१५ मा रोनाल्डोले आफु माथिल्लो स्तरको फुटबल र राम्रो क्लबबाट नै सन्यास लिने बताएका थिए ।