स्पेनका बिश्वकप बिजेता कप्तान तथा गोलकिपर इकर कासियासले स्पेनिस फुटबल फेडेरेशन (आरएफईएफ) को अध्यक्ष पदका लागि आफ्नो दावेदारी नदिने घोषणा गरेका छन् ।
कोरोना भाइरसले उत्पन्न संकटका कारण कासियासले अध्यक्ष पदका लागि नलड्ने घोषणा गरेका हुन् । “म आएफईएफको चुनावमा उठ्ने छैन,” हाल पोर्चुगलको एफसी पोर्टोमा रहेका कासियासले आफ्नो सामाजिक सञ्चालमा लेखेका छन् । उनले स्पेनले सामना गरिरहेको “सामाजिक आर्थिक र स्वास्थ्य समस्या लाई मध्येनजर गर्दै” अध्यक्ष नउठ्ने पनि स्पष्ट पारेका छन् ।
२७ हजार भन्दा बढीले ज्यान लिइसकेको कोरोना भाइरसले स्पेनको फुटबलको “चुनावलाई प्राथमिकता आधारमा दोश्रो स्थानमा रेलिगेट गरेको” उनले भने । कासियासले फेब्रुवरीमा अध्यक्ष पदका लागि लुईस रुबियालेसको प्रतिद्वन्दीका रुपमा चुनाव लड्ने मनसाय प्रकट गरेका थिए ।
कासियास नलड्ने भएपछि रुबियालेसलाई अगष्ट १७ को लागि तय भएको साधारण सभाबाट लगातार दोश्रो कार्यकालका लागि पुन नियुक्त हुनका लागि बाटो खुलेको छ । स्पेनका लागि १ सय ६७ खेल खेलेका कासियासले २००८ र २०१२ को युरो कप पनि जितेका थिए । २०१५ मा रियल म्याड्रिडको महान गोलकिपर मध्ये एक बनेर छोड्नुअघि उनले ७ सय खेल खेलेका थिए ।
यस क्रममा कासियासले पाँच वटा ला लिगा र तीन पटक च्याम्पियन्स लिगको उपाधि जितेका थिए । २०१९ मे मा माइनर ह्ृदयघात भए देखि उनले एक पनि प्रतिस्पर्धात्मक खेल खेलेका छैनन् ।
