एकपछि अर्को गर्दै समस्याको चक्रमा घेरिएका अखिल नेपाल फुटबल संघका अध्यक्ष कर्मा छिरिङ्ग शेर्पाबिरुद्ध अर्को आपत आइलागेको छ । तराईमा राष्ट्रियताको भावना नभएको भन्दै अभिव्यक्ति दिएका शेर्पासँगै यसपटक युवा तथा खेलकुदमन्त्री जगत बहादुर बिश्वकर्मा पनि बिवादमा तानिएका छन् ।
आर्थिक बर्ष २०७७–८८ का लागि प्रस्तुत भएको बजेटमाथिको छलफलका लागि बोलाइएको बैठकमा बोल्दै पर्साका सांसद प्रदीप यादवले मन्त्री बिश्वकर्माले एन्फाबाट १७ करोड रुपैया खाएको आरोप लगाएका छन् । बैठकमा मन्त्री बिश्वकर्मा आफै उपस्थित रहेका थिए ।
यादव समाजवादी पार्टीका सांसद हुन् । यादवले बिश्वकर्माले फुटबलको सर्वोच्च निकायबाट त्यो पैसा किन र के का लागि लिए यो भने भनेका छैनन् । शेर्पाले अनलाइन पोर्टललाई दिइएको एक अन्तर्वार्तामा बिखण्डनकारी अभिव्यक्ति दिएको भन्दै उनलाई निलम्बन गर्दै कडा कारवाही गर्न माग पनि गरेका छन् ।
उहाले सेनाको मार्फत तराईका मानिसहरुलाई राष्ट्रियता सिकाउनु पर्ने भन्नु भएको छ । सेना हाम्रो पवित्र संस्था हो । सेनालाई पनि मुछेर के गर्न खोज्नु भएको ? त्यस्तो अभिव्यक्ति दिने शेर्पालाई कानुनी कठघरामा ल्याइनु पर्छ । उहाँले मधेशीको अपमान गर्नु भएको छ, यादवले भने ।
शेर्पाले दुई दिन अघि एक बिज्ञप्ति जारी गर्दै आफ्नो अभिव्यक्तिका लागि माफि पनि मागिसकेका छन् । तर शेर्पा भने निरन्तर समस्याको भुमरीमा फस्दै गएका छन् । उनीबिरुद्ध उनकै उपाध्यक्ष पंकज बिक्रम नेम्वाङले फिफामा उजुरी समेत दिएका छन् ।