वेल्स स्ट्राइकर ग्यारेथ बेलको स्पेनिस ला लिगामा भविष्यलाई लिएर शंका उब्जिरहेको समय उनका एजेन्ट जोनाथन बार्नेटले उनी इङ्गलिस प्रिमियर लिगमा नफर्कने बताएका छन् ।
रियल म्याड्रिड समर्थक र प्रशिक्षक जिनेदिन जिदानसँग बिग्रिएको सम्बन्धका कारण बेललाई लगातार म्याड्रिड छोड्दै प्रिमियर लिग खेल्न गइरहेको चर्चासँग जोडिएको छ । तर बार्नेटले ३० बर्षिय बेल स्पेनको जीवनशैलिमा रमाइरहेको र इङ्गल्याण्ड फर्किने नचाहेको बताएका छन् ।
“बेलले रियलमा अहिले हप्ताको ६ लाख पाउण्ड लिने गरेका छन् र यदि प्रिमियर लिगमा फर्किने हो भने कोरोना भाइरसले निम्त्याएको आर्थिक मन्दिका कारण उनले ठूलै रकम गुमाउने तय छ । उनको अहिलेको मुल्य कति छ मलाई थाहा छैन । उनको अहिलेको तलब धेरै माथि छ र उनी कहा जान्छन् यो उनको जिन्दगीको लागि नै महत्वपूर्ण कुरा हो । उनलाई कति दिने हो यो क्लबहरुको निर्णय हो,” बार्नेटले भने ।
“उनी अहिले म्याड्रिडमा निकै खुशी छन् र जीवनशैली पनि एकदम राम्रो छ । बेलले म्याड्रिड बाहिर करिअर देखेका छन् भन्ने मलाई लाग्दैन,” बार्नेटले थपे । कोरोनाका कारण फुटबल स्थगित हुन अघि बेलले २०२० मा रियलका लागि मात्र चार खेलमा शुरुवाती एघारमा खेलेका छन् ।
बढी खेल्ने समय पाउने भएकाले प्रिमियर लिगले बेललाई लोभ्याउने त होइन नि भन्ने प्रश्नमा बार्नेट भन्छन्ः “होइन । उनले खोजेको जीवन उनी चाहन्छन् र त्यो स्पेनमा छ । आर्थिक रुपमा अब उनले बाकी रहेको जीवनका लागि केही चाहदैनन, उनको बच्चा र आउदो पिढीले पनि । उनले बिश्वकप बाहेक सबै जितिसकेका छन् । प्रिमियर लिगमा फर्किएर खेल्नु ठूलो कुरा हो र त्यो उनी गर्न चाहदैनन् ।”