स्पेनिस क्लब रियल म्याड्रिडले फ्रेन्च लिग वान बिजेता पेरिस सेन्ट जर्माइन (पिएसजी) का १७ बर्षिय डिफेन्डर ट्यानगाइ कुवासीलाई आफ्नो क्लबमा अनुबन्धन गर्ने इच्छा देखाएको छ ।
कुवासीको पिएसजीसँगको सम्झौता यसै सिजन सकिंदै छ र फ्रेन्च क्लब पनि उनीसंग नयाँ सम्झौता गर्ने पक्षमा नरहेका कारण रियलले उनलाई लामो समयका लागि भित्र्याउन खोजिरहेको छ । कुवासीको सम्झौता सकिए लगत्तै फ्रि ट्रान्सफरमा अनुबन्धन गर्न मिल्ने भएका कारण पनि रियलले उनीमाथि आखा लगाएको हो ।
रियलले कुवासीलाई कप्तान सर्जियो रामोसको स्थानको लागि हेरिरहेको छ । रामोसको अर्को सिजनको अन्त्यसंगै रियल म्याड्रिडसँगको सम्झौता सकिन गइरहेको छ । अर्को सम्झौताका लागि रियल र रामोसबीच कुनै पनि वार्ता शुरु नै नभएको पनि बताइउको छ ।
कुवासीलाई आँखा लगाइरहेको रियल एक मात्र क्लब भने होइन । युरोपका अन्य धेरै क्लबहरुले पनि उनलाई लिन सकिन्छ की भनेर आफूलाई तौलिरहेका छन् । ती मध्ये बार्सिलोना र च्याम्पियन्स लिग बिजेता लिभरपुल पनि रहेका छन् ।
कुवासीले पिएसजीको पहिलो टोलीमा अघिल्लो बर्ष डेब्यु गरेका थिए भने उनले सबै प्रतियोगिता गरेर क्लबका लागि १२ खेल खेलिसकेका छन् । उनले लिग वानमा खेलेको ६ खेलमा तीन गोल गरिसकेका छन् ।