टिमो वेर्नरले जर्मन बुन्डेसलिगामा आफ्नो २५ औं गोल गरेपछि आरबि लाइपजिग रोमाञ्चक खेलमा कोलोनलाई पराजित गर्दै अंक तालिकाको तेश्रो स्थानमा उक्लिएको छ ।
अवे खेलमा लाइपजिगले कालोनलाई ४–२ ले हरायो । जितपछि लाइपजिगको ५८ अंक भएको छ भने बोरुसिया डर्टमण्डमाथि दोश्रो स्थानका लागि थप दवाब पनि कायम गरेको छ । डर्टमण्डको ६० अंक रहेको छ । शिर्ष स्थानमा रहेको बायर्न म्युनिखको ६७ अंक रहेको छ भने सबैलै २९ खेल खेलिसकेका छन् ।
खेलमा जोन कोर्डोबाले सातौं मिनेटमै गोल गर्दै कोलोनलाई अग्रता दिलाएका थिए तर प्याट्रिक सिकले २० औ मिनेटमा खेल बराबरीमा ल्याएका थिए । क्रिष्टोफर एनकुन्कुले ३८ औं मिनेटमा दोश्रो गोल गरे भने वेर्नरले दोश्रो हाफ शुरु भएको पाँच मिनेटपछि गोल गर्दै लाइपजिगलाई ३–१ को फराकिलो अग्रता दिलाएका थिए ।
एन्थोनी मोडेस्टेले पाँच मिनेटपछि नै अग्रता घटाउने काम त गरे तर ड्यानिएल ओल्मोले ५७ औं मिनेटमा अर्को गोल थपेपछि लाइपजिगले उत्कृष्ट जित हात पारेको थियो । कोलोनले अर्को एक पेनाल्टी त पाएको थियो तर भिडियो असिस्टेन्ट रेफ्रिको मद्दतमा उक्त पेनाल्टी फिर्ता लिइएको थियो ।
बुन्डेसलिगामा १५ अवे गोल गर्ने वेर्नर पाचौं खेलाडी पनि बनेका छन् । बुन्डेसलिगामा बोरुसिया मोइचेनग्ल्याडब्याच चौथो र बायर लेभरकुसन पाचौं स्थानमा रहेका छन् । दुवैको २९ खेलबाट समान ५६ अंक रहेको छ ।
