पूर्व बिश्व नम्बर एक खेलाडी किम क्लाइस्टर्स ३७ बर्षको उमेरमा दोश्रो पटक सन्यास फिर्ता लिदै टेनिस कोर्टमा फर्किने भएकी छिन् ।
“म अझै पनि सकृय रुपमा टेनिसमा लाग्नको लागि उत्प्रेरित छु । कोरोनाका कारण रोकिएको यो सिजनका खेलहरु चाडै नै सुरु हुने आशा गर्दछु । प्रतियोगिताहरु यदि हुन नसक्ने हो भने पनि टेनिसमा फर्कने आफ्नो उद्देश्यबाट बिमुख हुने छैन,” क्लाइस्टर्सले भनिन् ।
क्लाइस्टसले युएस ओपन खेल्ने लक्ष्य बोकपनि कोरोना भाइरसका कारण प्रतियोगिता हुने नहुने बिषयमा केही टुँगो लाग्न सकेको छैन । यसले गर्दा क्लाइस्टर्सले आफ्नो पुनरागमनका लागि पनि कुर्नु पर्ने देखिन्छ । चार पटकको ग्रान्ड स्ल्याम बिजेता क्लाइस्टर्सले सन् २००७ मा सन्यास घोषणा गरेकी थिइन् ।
उनी सन्यास अघि र सन्यास फिर्ता लिए पछि पनि विश्व नम्बर एक महिला खेलाडी बन्न सफल भएकी थिइन् । आफ्नो पहिलो सन्तानका रुपमा छोरीलाई सन् २००८ मा जन्म दिएकी उनले फेरी २००९ पछि सन्यास फिर्ता लिएकी थिइन् ।
आफ्नो सन्यास अघि युएस ओपन जितेकी क्लाइस्टर्सले सन्यास फिर्ता लिए पछि एक पटक अस्ट्रेलियन ओपन र दुई पटक युएस ओपनको उपाधि हात पारेकी थिइन् । उनले फेरी सन् २०१२ मा सन्यास घोषणा गरेकी थिइन् । त्यस पछि उनले दुई छोरालाई जन्म दिएकी छिन् ।
“मलाई पहिले खेल्न पुगेको जस्तो लागेको थियो । जब मेरो तेश्रो बच्चा भयो मैलें कमेन्ट्री गर्न थालें । तर मलाई अझै पनि आफु भित्रको खेलाडी अझै जिउदै रहेको भान हुन थाल्यो । टेनिसको र्याकेट समात्नका लागि मेरो हात पनि चिलाइरहेको छ,” उनले भनेकी छिन् ।