दक्षिण कोरियाको प्रथम श्रेणीको फुटबल के–लिगमा एक ठूलो क्लबले खाली रंगशाला भर्नका लागि सेक्स डलहरु राखेपछि व्यापक आलोचना भएको छ ।
एफसी सोलले सप्ताहन्तको एक खेलमा कोरोना भाइरसका कारण खाली रहेको रंगशालामा उपस्थिति देखाउनका लागि जर्सी लगाएका पुतलाहरु राखेको थियो । ग्वाँगजु एफसीबिरुद्ध भएको खेलमा राखिएका पुतलाहरु मध्ये केहीको टि–शर्टमा सोलोएसको लोगो रहेको थियो । सोलोएस कोरियामा यौन खेलौना बेच्ने कम्पनी हो ।
सामाजिक दुरीको निदेर्शन पालना गर्दै मास्क लगाएर राखिएका केही पुतलाहरुले समातेको प्लाकार्डमा कम्पनीको बिज्ञापन र मोडलहरुको प्रबद्र्धन गरिएको थियो ।
ती मध्ये धेरै जसो महिला थिए भने निकै कम पुरुष । एफसी सोलले ती पुतलाहरुको सम्बन्ध सेक्स टोयसँग नरहेको बताएपनि कोरियन जनताहरुलाई यो जवाफले चित्त बुझाउने भने सकेन । यस घट्नाले ठूलै रुप लिन पुगेपछि भने सोलले सार्वजनिक माफि नै मागेको छ ।
एफसी सोलले आफूलाई पुतला दिएको कम्पनीले यसअघि सोलोएसलाई पनि उपलब्ध गराएको भएर त्यसको बिज्ञापन त्यहा रहन गएको बतायो । समर्थकहरुको चित्त दुख्न गएकोमा हामी क्षमा माग्न चाहन्छौं, एफसी सोलले मिडिया र फ्यान बृत्तमा आफ्नो छवि धमिलिने देखिएपछि एक बिज्ञप्ति मार्फत लेखेको छ ।
“यस्तो घटिया उपाय कसरी यिनीहरुको दिमागमा आयो मलाई त अचम्म नै लागि रहेको छ । यो अन्तर्राष्ट्रिय बेइज्जती नै हो,” एक फ्यानले भने । “एफसी सोलले रँगशालालाई एक्स जोन बनायो ,” निकै क्रुद्ध अर्का फ्यानले भने ।
दुई महिना भन्दा बढी समय कोरोना भाइरसका महामारीका कारण रोकिएपछि के–लिग मे ८ देखि सुचारु भएको हो । दर्शकहरुलाई रँगशालामा प्रवेशमा रोक लगाइएको छ । रँगशाला भर्नका लागि क्लबहरुले प्लाकार्ड, कार्ड बोर्डलाई काटेर दिइएको मान्छेको स्वरुप र ब्यानर प्रयोग गरेका छन् भने कुनै क्लबहरुले दर्शकको आवाजको रेकर्डिङ्ग समेत बजाइरहेका छन् ।
एफसी सोलले बिवादमा घेरिनु अघि सोल वल्र्डकप स्टेडियममा ग्वाँगजुलाई १–० ले हराएको थियो । दक्षिण कोरिया कोरोना भाइरसका कारण सबैभन्दा कम संक्रमित देशहरुमध्ये रहेको छ । त्यहा ११ हजार ६५ संक्रमित रहेका छन् भने अहिलेसम्म २ सय ६३ जनको मृत्यु भएको छ ।