अन्तरास्ट्रिय क्रिकेट परिषद (आईसीसी) ले यसै बर्ष अक्टोबर १८ देखि नोभेम्बर १५ सम्म अस्ट्रेलियामा आयोजना हुने ट्वान्टी ट्वान्टी विश्वकप दुई बर्ष पछि अर्थात् सन् २०२२ लाई सार्ने संकेत देखाएको छ ।
आईसीसीको मे २८ (१२ दिन पछि) बस्ने बोर्ड बैठकले यसको टुंगो लगाउने छ । कोरोना भाइरसका कारण मार्च देखि कुनै पनि क्रिकेट गतिविधि हुन सकेको छैन भने आगामी दिनमा पनि के कहिले गर्न सकिन्छ भन्ने टुंगो गर्न गार्हो हुने अवस्था रहेको छ ।
सन् २०२१ मा भारतले ट्वान्टी ट्वान्टी विश्वकप आयोजना गर्दै छ भने यसका कारण अहिले सरेको विश्वकप सन् २०२२ मा आयोजना गर्ने बाहेक अरु विकल्प आईसीसीसँग छैन ।
आईसीसीले विश्वकप सार्ने कि नसार्ने भन्ने बिषयमा आर्थिक पाटोको पनि महत्व रहने छ ।यदि कोरोनाको प्रभाबका बीचमा नै विश्वकप आयोजना गरेको खण्डमा त्यसले धेरै आर्थिक भार पर्ने छ । विश्वकप अघि प्रतियोगितामा सहभागी १६ टोलीका खेलाडी र त्यसका अन्य सदस्य, लाइभ ब्रोडकास्ट गर्ने टिभीका सदस्यहरु सबैलाई दुई हप्ता क्वारेनटाइनमा राख्न पर्ने हुन्छ जसका लागि निकै खर्च लाग्ने छ ।
त्यस्तै विश्वकप सरेको खण्डमा खराब आर्थिक अवस्थामा गुज्रिरहेको अस्ट्रेलिया क्रिकेट बोर्डलाई भने यसले ठुलै धक्का लाग्ने देखिन्छ । त्यस्तै भारतीय क्रिकेट बोर्डलाई भने यसले फाइदा नै पुग्ने छ । विश्वकप समयमा नै आयोजना हुने भयो भने भारतले इण्डियन प्रिमिएर लिग (आईपीएल) गराउन सम्भव हुँदैन जसले गर्दा उसले चार हजार करोड भारतीय रुपैयां गुमाउने र आर्थिक संकटमा पर्नेछ ।
त्यस्तै आईसीसीको बोर्ड बैठकले कोरोनाको प्रभाब कम भए पछि अन्तरास्ट्रिय खेल फर्कने अवस्थामा के गर्न पाइने के गर्न नपाइने भन्ने नियमहरु पनि अभिलम्बन गर्ने छ । उसले बिशेष गरि बल चम्काउन थुक अथवा पसिना लगाउन पाउने नियम बारेमा पनि निर्णय गर्ने छ । बोर्डले आईसीसीका हालका अध्यक्ष शंकर मनोहरको पदावधि पनि दुई महिना सार्ने बिषयमा टुंगो लगाउने छ ।
