जर्मन प्रथम श्रेणी बुन्डेसलिगाको टोली अस्बर्गका प्रमुख प्रशिक्षक हिको हेरलिचले क्वारेन्टिन नियम तोड्दै दात माझ्ने मञ्जन किन्न गएपछि सुचारु हुन गइरहेको लिगको पहिलो खेल गुमाउने भएका छन् ।
कोरोना भाइरसका कारण बन्द भएको बुन्डेसलिगा शनिबार शुरु हुन गइरहेको छ भने पहिलो खेलमा अस्बर्गले उल्फ्सबर्गको सामना गर्न गइरहेको छ । बिहिबारको पत्रकार सम्मेलनमा आफूले क्वारेन्टिन नियम तोड्दै होटल बाहिर निक्लदै पसलमा मञ्जन खरिद गर्न गएको हेरलिचले स्विकारेका छन् ।
बुन्डेसलिगाका सबै टोलीहरुलाई प्रतियोगिता सुचारु गर्नु अघि क्वारेन्टिनमा राखिएको छ । मैले होटल छोडेर गल्ति गरे, एक बिज्ञप्तिमा हेरलिचले भनेका छन् । ४८ बर्षिय हेरलिच मार्च १० मा अस्बर्गको प्रशिक्षक नियुक्त भएका थिए भने शनिबारको खेल उनको लागि पहिलो हुन गइरहेको थियो ।
बुन्डेसलिगा मार्च दोश्रो सातादेखि स्थगित गरिएको थियो भने युरोपका ठूला देशहरुमध्ये सबैभन्दा कम प्रभावित जर्मनीले लकडाउनलाई खुकुलो पार्दै बन्द रँगशालामा लिग फुटबल सुचारु गर्न गइरहेको हो ।
“क्वारेन्टिनमा मैले अपनाउनु पर्ने सबै सावधानी अपनाएपनि यो स्थितिमा भने टिम र पब्लिकको रोल मोडलको रुपमा काम गर्न असफल भए । म आफ्नो गल्ति स्विकार्छु । म शुक्रबारको प्रशिक्षण र शनिबारको खेलको लागि टिममा हुने छैन,” यसअघि भएको भिडियो कन्फेरेन्समा टुथपेस्ट नभएर नजिकैको सुपर मार्केट गएको स्विकारेका हेरलिचले भने ।
अस्बर्गले खेलाडी र कोचिङ्ग स्टाफहरुको नियमित रुपमा कोरोना भाइरस परिक्षण भइरहेको र हेरलिचको दुई वटा परिणाम नेगेटिभ आएमा उनी टोलीसँग जोडिन पाउने बताएको छ । बुन्डेसलिगमा १४ औं स्थानमा रहेको अस्बर्ग रेलिगेसन जोन भन्दा पाँच अक माथि छ ।