म्यानचेस्टर सिटी विङ्गर लिरोय साने जर्मन बुन्डेसलिगा क्लब बायर्न म्युनिखमा पाँच बर्षको सम्झौताको लागि तयार भएका छन्, जर्मनीको भरपर्दो खेलकुद म्यागजिन स्पोर्टस बिल्डले बुधबारको रिपोर्टमा उल्लेख गरेको छ ।
२४ बर्षिय साने बायर्न जान तयार रहेको र उनको अनुबन्धन रकमका बिषयमा अझै पनि दुई पक्षबीच वार्ता जारी रहेको बिल्डले लेखेको छ । बायर्नका खेलकुद निर्देशक हसन सलीहामिदिच र बोर्ड सदस्य ओलिभर कान सानेलाई ४३ मिलियन डलरमा बायर्न भित्र्याउन चाहन्छन् । यो उनको बजार भाउभन्दा आधा रकम हो ।
यद्दपी गत अगष्टमा वेम्ब्लीमा लिभरपुलबिरुद्धको कम्युनिटी सिल्ड म्याचमा दायाँ घुडाको लिगामेन्ट च्यातिए यता साने सिटीको पहिलो टोलीका लागि मैदान उत्रिएका भने छैनन् । बिल्डका अनुसार लामो समय मैदानमा बाहिर रहेका कारण नै बायर्नले सस्तो मुल्यमा सानेलाई भित्र्याउन गइरहेको जनाएको छ ।
सन् २०१६ मा अर्को जर्मन क्लब साल्केबाट झण्डै ४६ मिलियन डलरमा म्यानचेष्टर सिटी आएका सानेको अनुबन्धन २०२१ सम्म रहेको छ । अगष्टमा चोट बोक्नु अघि बायर्नले सानेलाई किन्न खोज्दा उनको ट्रान्सफर रकम १ सय ७ मिलियन डलर रहेको थियो । कोरोना भाइरसका कारण फुटबल अर्थतन्त्र बिस्तारै धराशायी बन्दै जादा बायर्न चाहिएकै रकममा सानेलाई अलायन्ज अरिनामा भित्र्याउन सक्नेछ ।