पछिल्लो समय यस सिजनको ट्रान्सफर विन्डोमा पेरिस सेन्ट जर्माइन (पिएसजी) का फरवार्ड किलियन एमबाप्पे स्पेनिस क्लब रियल म्याड्रिड जाने चर्चा चलिरहेको छ ।
अहिले पनि रियल एमबाप्पेलाई अनुबन्धन गराउन चाहन्छ । तर एमबाप्पे पिएसजीमा नै बस्ने समाचार बाहिर आएको छ । फ्रान्सको पत्रिका लेकुपका अनुसार रियलले आफ्नो क्लबमा अनुबन्ध गर्न चाहे पनि एमबाप्पे भने पिएसजीमा नै बस्न राजी भएका छन् ।
सो पत्रिकाका अनुसार एमबाप्पेको सम्झौता सन् २०२२ सम्म रहेको छ । पिएसजी २०२२ मा एमबाप्पेलाई सित्तैमा बेच्ने तर हालको लागि उनलाई क्लबमा नै राख्ने योजनामा रहेको छ ।
त्यस्तै एमबाप्पेलाई क्लबमा राख्नका लागि पिएसजीले नेमारलाई दिने जति नै तलब दिनका लागि राजी भएको पनि लेकुपले जनाएको छ । नेमारले प्रति हप्ता ६ लाख पाउण्ड तलब बुझ्छन् भने एमबाप्पेको त्यसको आधा जस्तो मात्र तलब रहेको छ ।
सन् २०१७ मा मोनाकोबाट एक सय ६६ मिलियन पाउण्डमा पिएसजी आएका २१ बर्षिय एमबाप्पेले सबै प्रतियोगिता गरेर क्लबका लागि १२० खेल खेल्दै ९० गोल गरेका छन् ।
