डिएगो कोस्टाले आफ्ना पुर्व प्रशिक्षक समेत रहेका एन्टोनियो कोन्टे रियल म्याड्रिडका प्रशिक्षक भएका भए एक सिजन पनि टिक्न नसक्ने बताएका छन् ।
इङ्गल्यान्ड र इटालीमा लिग जितिसकेका कोन्टे हाल इन्टर मिलनका प्रशिक्षक रहेका छन् । कोस्टाले कोन्टेमा मानवीय भावना नरहेको पनि बताए । “उनी राम्रा प्रशिक्षक हुन् तर हाम्रो सम्बन्ध खेल बाहिर भने राम्रो रहन सकेन,” कोस्टाले इएसपिएनसँग कुरा गर्दै भने । उनले कोन्टेले आफुमा मानव भावना राख्नु पर्ने पनि बताए ।
“उनी धेरै राम्रा प्रशिक्षक मध्येका एक हुन तर उत्कृष्ट प्रशिक्षक हुनका निम्ती उनले आफ्नो मानवीय पक्ष पनि सुधार्नु पर्छ । उनी धेरै शंकास्पद छन् । रियल म्याड्रिड जस्तो टोलीमा भएका भए उनलाई एक सिजन पनि टिक्न मुस्किल पर्नेछ,” कोस्टाले भने ।
कोन्टेले लगातार तीन पटक इटालियन सिरी आ र एक प्रिमियर लिग र एफए कप जितेका थिए । कोन्टेको नेतृत्वमा चेल्सीले पहिलो सिजन डिएगो कोस्टाकै मद्दतमा प्रिमियर लिग जित्न सफल भएको थियो । दोस्रो सिजनमा भने कोन्टे र कोस्टा बिच खट्पट भएका कारण कोन्टेले कोस्टालाई बेच्ने निर्णय गरे सँगै सम्बन्ध चिसिएको थियो ।