सन् २००७ मा चेल्सीले तत्कालिन प्रशिक्षक होजे माउरिन्होलाई बर्खास्त गर्दा चेल्सीका पुरै टोली नै रोेएको क्लबका पुर्व कप्तान जोन टेरीले खुलासा गरेका छन् ।
सन् २००४ को च्याम्पियन्स लिगको फाइनलमा मोनाकोलाई ३–० ले पराजित गर्दै एफसी पोर्टोेले उपाधि चुमे पछि क्लाउडियो रानिएरीको स्थानमा क्लबको म्यानेजरका रुपमा माउरिन्हो स्ट्यामफोर्ड ब्रिज आएका थिए ।
द ब्लुजको पहिलो पत्रकार सम्मेलनमा नै पोर्चुगिज माउरिन्होले आफैले आफैलाई ’द स्पेसल वान’ अर्थात् ’बिशेष’ घोषणा गरेका थिए । त्यस्तै उनले आफ्नो नेतृत्वमा चेल्सीले इङ्गलिस फुटबलमा राज गर्ने पनि बताए । माउरिन्होले त्यसपछि चेल्सीलाई लगातार दुईपटक प्रिमियर लिग, एक एफए कप र दुई पटक लिग कपको बिजेता बनाए ।
सन् २००७–०८ को सिजनमा खराब शुरुवात गरे पछि चेल्सीका धनाढ्य मालिक रोमन अब्राहिमोभिचसँग मनमुटाब बढेपछि उनलाई बर्खास्त गरिएको थियो । चेल्सीमा फादर फिगर (पिता समान) भइसकेका माउरिन्हो बर्खास्त भएपछि चेल्सीका खेलाडीले क्लब व्यवस्थापनलाई निर्णय उल्टाउन आग्रह पनि गरेको टेरीले जानकारी दिए ।
पुर्व डिफेन्डर टेरीले भने: “हामी सबैको आँखामा आँशु थियो । त्यो समय जताततै हल्ला थियो, हामीले राम्रो खेल्न सकेका थिएनौं, प्रदर्शन राम्रो थिएन, प्रिमियर लिगमा पनि हाम्रो प्रदर्शन निकै कमजोर थियो । एक दिन माउरिन्हो आएर भने, मलाई क्लबले बर्खास्त गर्यो । उनी हामी सबै भएको ठाउँमा आएर सबैलाई अंगालो हाले ।”
“हामी सबै रोयौं । हामीले अब यहाँबाट कहाँ जाने । उनी पिता समान थिए, हामीहरुलाई मार्गनिर्देश गर्ने । हामी चेल्सीको कार्य समितिमा गएर अहिले सम्म काम गरेकोमा उनी नै सबैभन्दा उत्कृष्ट हुन् त्यसैले माउरिन्होलाई क्लबमा राख्दै फिर्ता बोलाउन आग्रह गर्यौं ।
त्यस्तै टेरीले माउरिन्होको चेल्सीका सबै खेलाडीसँग एक भिन्नै खालको सम्बन्ध रहेको पनि बताए । “सामान्य समयमा पनि उनी मलाई र अन्य खेलाडीलाई मेसेज गर्थे र हाम्रो श्रीमती, बच्चाहरु र उनीहरुको स्कुलको बारेमा जानकारी राख्थे । यस्तो मलाई उनले बाहेक कसैले सोधेको थाहा थिएन,” टेरीले भने ।