इङ्गलिस प्रिमियर लिग (इपिएल) टोली ब्राइटनका मालिक टोनी ब्लुमले लिगको बाँकी खेल कोरोना भाइरसका कारण हुन नसके रेलिगेसन हटाउनु पर्ने धारणा ब्यक्त गरेका छन् ।
विश्वभर फैलिएको कोरोना भाइरसका कारण हालसम्म १ लाख ६० हजारभन्दा बढीको मृत्यु भइसकेको छ । चीनको बुहानबाट शुरु भएको कोरोना आहिले विश्वका सबै देशमा फैलिएको छ भने यसले अन्य क्षेत्र सहित खेलकुदलाई नै ठप्प बनाएको छ ।
कोरोना कहिले सकिने छ र कहिले सबैकुरा सामान्य हुनेछ भन्ने केहि निश्चित छैन । जसले गर्दा विश्वभर संचालन हुने लिग र प्रतियोगिताहरुको के गर्ने भन्ने बिषयमा केहि टुँगो लाग्न सकेको छैन । त्यस्तै ईपिएल पनि के गर्ने भन्ने निश्चित भएको छैन ।
ब्राइटनका मालिक टोनी ब्लुम भने रेलिगेसन हटाउनु पर्ने धारणा राख्छन् । लिग रोकिनु अघि २९ खेल खेलेको ब्राइटन २९ अंक सहित १५ औं स्थानमा रहेको छ भने बर्नमाउथ, एस्टन भिल्ला र नर्विच रेलिगेसन जोनमा छन् ।
“मैले अब सिजनको बाँकी खेल हुने कुनै पनि छाँटकाँट देखेको छैन । यदि बाँकी खेल नभएको खण्डमा प्रति खेलको आधारमा अंक बाँढिने छ । यो आधारमा जाने हो भने हामी शुन्य दशमलब दुई अंकले रेलिगेसनमा पर्नेछौं,” ब्लुमले भने । “अहिले सम्मको आधारमा १५ औं स्थानको टोली रेलिगेसनमा पर्ने छ ।”