कुनै पनि खेलाडीले प्रहार गरेको गोललाई नै आधार मान्ने हो भने रोबर्टो फर्मिनोले लिभरपुलका लागि यो सिजन गोल गर्न सकेका छैनन् । तर एउटा खेलाडीले आफ्नो टोलीको लागि गरेको योगदानलाई आधार मान्ने हो भने उनी लिभरपुलका निकै महत्वपूर्ण सदस्य हुन् ।
माथिको भनाई लिभरपुलका व्यवस्थापक योर्गेन क्लोपको हो । यो सिजन ब्राजिलियन स्ट्राइकर फर्मिनोले लिभरपुलको लागि मात्र २० गोल गरेका छन् । शायद विश्वस्तरीय स्ट्राइकरका लागि एक सिजनमा २० मात्र गोल संख्यात्मक हिसाबले निकै कम हुन सक्छ । तर पनि क्लोप फर्मिनोको प्रदर्शनमा खुशी छन् र अझै यस्तै प्रदर्शन गर्नेमा आशावादी पनि ।
“फर्मिनो विश्वस्तरीय स्ट्राइकर हुन्,” क्लोप भन्छन् । “यदि टोलीको लागि कुनै पनि खेलाडीले महत्वपूर्ण योगदान गर्दछन् भने तथ्यांकले धेरै मान्यता राख्दैन । लिभरपुलको लागि फर्मिनोले यस्तै गरेका छन्। तपाईले बबी जस्तो निस्वार्थ खेलाडी कमै भेट्नु हुन्छ । उनी बल यता उता खेलाउन, पास दिनमा नै खुशी हुन्छन् । अनि चार पाँच हप्तापछि बल्ल मैलें त गोल नै गरेको छैन भनेर बिचार गर्छन ।”
फर्मिनोले लिभरपुलको जर्सिमा २३५ खेल खेलेका छन् भने ७७ गोल आफ्नो नाममा दर्ता गराएका छन् । उनी सन् २०१५ मा जर्मन बुन्डेसलिगा क्लब होफेनहाइमबाट लिभरपुलमा आबद्द भएका थिए ।
एट्लेटिको म्याड्रिडसँग पराजित भएको च्याम्पियन्स लिगको प्रि क्वार्टरफाइनलको दोश्रो लेगमा गोल गर्दा उनले यो सिजन पहिलो पटक एन्फिल्डमा आफ्नो खाता खोलेका थिए ।