गौरव फुयाल, पोखरा
नेपाल पुलिस क्लबलाई टाई ब्रेकरमा ४–३ ले पराजित गर्दै मनाङ मस्र्याङ्गदी क्लब आहा–रारा गोल्डकपको सर्वाधिक सफल टिम बन्न सफल भएको छ ।
पुलिसका लागि भोला सिलवाल, हेम तामङ, बुद्ध बल तामङले गोल गरे भने तेज र अजित भन्डारीको प्रहार मनाङका गोलकिपर अशोकले बचाए । मनाङका लागि अन्जन, पुजन उपरकोटि, रन्जन बिष्टले गोल गरे भने निशान लिम्बुको प्रहार पुलिसका गोलकिपर रोशन खड्काले बचाए ।
पोखरा रँगशालामा सम्पन्न फाइनलमा निर्धारित ९० मिनेट र अतिरिक्त ३० मिनेटको समय गोलरहित बराबरीमा टुङ्गिएपछि खेलको निर्णय टाईब्रेकर बाट भएको थियो । त्यसमा मनाङले बाजी मार्दै किर्तिमानी छैटौं पटक उपाधि आफ्नो नाममा लेखाउन सफल भयो ।
पहिलो हाफमा दुबै टोलिले राम्रो मौका सृजना गरेका थिए । १३ औँ मिनेटमा अन्जन बिस्टको क्रसलाई विदेशी खेलाडि फ्लोरेन्टले पोस्टको दिशा दिन सकेनन् । १९ औँ मिनेटमा अन्जनलाई लडाएपछि प्राप्त फ्रि किकमा कमल श्रेष्ठले गरेको प्रहारले बिमल रानालाई भेट्टाएपनि उनको हेडर भने थोरै मात्र बाहिरिएको थियो ।
३७ औं मिनेटमा पुलिसका लागि तेज तामाङले गरेको प्रहार अशोक बरालले बचाएका थिए । ४२ औँ मिनेटमा बिमलले गरेको एक्रोव्याटिक सटलाई पुलिसका अजित भन्डारीले गोल लाइनबाट क्लियर गरिदिएका थिए ।
दोस्रो हाफको शुरुवात बाट नै आक्रमक देखिएको पुलिसले ४८ औं मिनेटमा गोल गर्ने मौका गुमायो । नीर कुमार राइले गरेको प्रहार अशोकले बचाएका थिए । ५६ औं मिनेटमा तेजको लामो प्रहार बहिरिन पुग्दा पुलिस अग्रता लिन फेरि चुकेको थियो । ५९ औँ मिनेटमा मनाङका अन्जनले गरेको ऐक्रोब्याटिक सट पोस्टबाट थोरै बाहिरिन पुग्यो ।
