अखिल नेपाल फुटबल संघ (एन्फा) बिश्वभर त्रास फैलाएको कोरोना भाइरसबिरुद्ध शतर्कता अपनाउदै शहीद स्मरक बि डिभिजन लिगका लाथि एन्फा कम्प्लेक्स परिसर छिर्ने खेलाडी, रेफ्री, पदाधिकारी र दर्शकको तापक्रम लिएर मात्र प्रवेश दिन शुरु गरेको छ ।
बि डिभिजन लिग अन्तर्गत टुसाल युवा क्लब र खुमल्टार युवा क्लबबीचको बिहिबार भएको खेल अघि एन्फाले यो कदम चालेको हो । एन्फाले परिसर प्रवेश गर्ने सबैको थर्मोमिटर गन मार्फत तापक्रम लिइरहेको छ । कोरोना भाइरसको पहिलो लक्षण तापक्रम बढ्नु, जिउ दुख्नु र सामान्य रुघा खोकी लाग्नु रहेको छ ।
नेपालमा अहिले सम्म कोभिद–१९ को संक्रमण नदेखिए पनि यसको असर नेपाली फुटबलमा मात्र नभइ सम्पूर्ण खेल क्षेत्रमै परिसकेको छ । प्रशस्त प्रतियोगिताहरु रद्द भैसकेका छन् । कोरोनाकै कारण एभरेष्ट प्रिभियर लिग क्रिकेट पनि स्थगित गरिएपछि बिश्वस्तरीय क्रिकेटरहरुको आगमनमा शंका उत्पन्न भइसकेको छ ।
अन्य विभिन्न देशमा यस्को प्रभावका कारण फुटबल खेलमा असर परेको प्रस्ट देखिन्छ । अन्य देशका लिग हरुमा बिना दर्शक खेल खेलाउन सुरु गरिसके पनि एन्फाले भने बि डिभिजन लिगलाई यथास्थितिमै सञ्चालन गरिरहेको छ ।