आदर्श ढकाल, बैंकक
नेपाली टोलीका कप्तान ज्ञानेन्द्र मल्लले सनसनीपूर्ण प्रदर्शन गर्दै राष्ट्रिय टिममा स्थान बनाएका युवा खेलाडी कुशल मल्लमाथि अत्याधिक अपेक्षाको दवाब नदिदा उपयुक्त हुने बताएका छन् ।
कुशलले भर्खरै नेपालमा सम्पन्न आईसिसि क्रिकेट बिश्वकप लिग टुका दौरान अमेरिकाबिरुद्धको खेलमा उत्कृष्ट ब्याटिङ्ग प्रदर्शन गर्दै डेब्युमै एकदिवसीय अन्तर्राष्ट्रियमा अद्र्धशतक प्रहार गर्ने बिश्वकै कान्छा खेलाडी बनेका थिए । कुशलले नेपाललाई ४९ रनमा ५ विकेटको नाजुक स्थितिबाट उद्दार गर्दै ५१ बलमा ५० रन बनाएका थिए ।
बिनोद भण्डारीसँग छैटौं विकेटका लागि ८४ रनको साझेदारी गरेका कुशलले बहादुरीपूर्ण इनिङ्गस खेल्दै चार चौका र तीन आक्रमक छक्का पनि प्रहार गरेका थिए । उनकै इनिङ्गसको मद्दतमा नेपालले अमेरिकालाई ३५ रनले हराएको थियो ।
कुशल अहिले नेपाली टोलीसँगै थाइल्याण्डमा छन् भने नेपालले मलेसियासँग एसिसि इस्टर्न रिजन ट्वान्टी ट्वान्टी एसिया कप क्वालिफायर्समा खेल्दा अर्को खेलको प्रतिक्षामा हुनेछन् । नेपाली टोलीका कप्तान ज्ञानेन्द्रले कुशललाई अहिलेका लागि आफ्नो खेलको आनन्द उठाउन दिइनुपर्ने बताएका छन् ।
“कुशल एकदम प्रतिभावान र क्षमता भएका खेलाडी हुन् । यसको झलक उनले अमेरिकाबिरुद्धको खेलमा पनि देखाइसकेका छन् । तर उनलाई त्यतिकै छोड्नु पर्छ जस्तो लाग्छ । धेरै जानकारीहरु बाहिरबाट उनको अगाडी आउदा एक राम्रो खेलाडीलाई निकै नै अप्ठ्यारोमा पार्न सक्छ,” ज्ञानेन्द्रले बैंककमा क्रिकेटिङ्गनेपाललाई भने ।
अमेरिकाबिरुद्धको खेलपछि उनीबाट धेरै नै अपेक्षा गरिएको छ । तर उनलाई दवाब दिएर बाध्नु भन्दा पनि अहिलेको लागि समय दिनुपर्छ । उनलाई अभै एक–दुईवटा प्रतियोगिताहरुमा आफूलाई खेलको आनन्द उठाउन दिनुपर्छ । उनी अहिले धेरै नै साना छन् । कति कुराहरु उनलाई थाहा पनि छैन भने र आफुलाई लिएर के भइरहेको छ भनेर बुझ्न समय पनि लाग्नेछ । त्यसैले उनलाई समय दिनु आवश्यक छ जस्तो लाग्छ,” ज्ञानेन्द्रले भने ।
