च्याम्पियन्स लिग इतिहासमा आफ्नो घरेलु मैदानमा अहिलेसम्मकै खराब प्रदर्शन गरेपछि चेल्सीले च्याम्पियन्स लिग प्रि क्वार्टर फाइनलमा बायर्न म्युनिखसँग ३–० को लज्जास्पद हार बेहोरेको छ ।
स्ट्यामफोर्ड ब्रिजमा सर्जि नाब्रीले दुई गोल गरेपछि बायर्नले पहिलो लेगमै एउटा खुट्टा क्वार्टर फाइनलमा राखेको हो । समुह चरणमा टोटेन्ह्याम हट्स्परलाई उसकै घरमा ७–२ ले हराउदा नाब्रीले ४ गोल गरेका थिए ।
बायर्नका लागि एक पटक फेरि अवे खेलमा पुर्व आर्सनल स्टार नाब्री चम्किन पुगे । नाब्रीले मङ्गलबार रातिको खेलमा दुवै गोल दोश्रो हाफमा रोबर्ट लेवान्डोस्कीको पासमा गरेका थिए । लेवान्डोस्कीले नै चेल्सीको पुनरागमनको आशामाथि तुषारापात गर्दै अफोन्सो डेभिजको पासमा ७६ औं मिनेटमा तेश्रो गोल गरेका थिए ।
चेल्सीले अन्तिम समयमा मार्कस अलोन्सोलाई गुमाउदै १० खेलाडीमा सिमित बन्न पुगेको थियो । क्वार्टर फाइनल प्रवेशका लागि चेल्सीले अब बायर्नको अलायन्ज अरिनामा कम्तिमा पनि ३–० को जित हात पार्नुपर्नेछ । यस्तो भएको खण्डमा खेलको निर्णय पेनाल्टी सुटआउट मार्फत हुनेछ ।
