अमेरिकन बक्सर डिओन्टे वाइल्डरको पाँच बर्षे राजलाई समाप्त गर्दै ब्रिटेनका टाइसन फ्युरी टेक्निकल नकआउटका आधारमा डब्लुबिसि वल्र्ड हेभिवेट च्याम्पियन बनेका छन् ।
अमेरिकाको लास भेगासमा भएको खेलमा फ्युरीले आफ्नो बक्सिङ करिअरकै उत्कृष्ट प्रदर्शन गर्दै सात राउण्डसम्म चलेको फाइटमा वाइल्डरलाई ध्वस्त पारेका थिए । सन् २०१८ मा दुई बक्सबिचको भिडन्त पक्का भए यता कसैले पनि फ्युरीले त्यस्तो दवाब कायम गर्छन भनेर सोचेकै थिएनन् ।
एमजिएम ग्राण्ड अरिनामा घरेलु समर्थकलाई स्तब्ध पार्दै वाइल्डरलाई तेश्रो र पाचौं राउण्डमा ढालेका थिए । फ्युरीको सशक्त प्रहारका बावजुद उठेर भिडेका वाइल्डरलाई उनका कर्नरले सातौं राउण्डमा टावेल फाल्दै फाइट समाप्त भएको जनएका थिए ।
फ्युरीले सन् २०१५ मा आफ्नो हेभिवेट टाइटलको उपाधि गुमाउदै आए यता वाइल्डरले एक छत्र राज गरेका थिए । आइतबार बिहानको हारले वाइल्डरको व्यवसायिक करिअर नै समाप्त भएको हुनसक्ने बक्सिङका पण्डितहरुले बताउन थालेका छन् । वाइल्डरले फाइटमा मुस्किलले फ्युरीमाथि पञ्च गर्न सकेका थिए ।
जितपछि फ्युरीले वाइल्डरको प्रशंसा समेत गर्न भ्याए । “म वाइल्डरको साहसलाई सलाम गर्न चाहन्छु । उनले एक च्याम्पियनको मुटु देखाएका थिए । उनले फाइटलाई सातौं राउण्डसम्म तानेर लगे । उनी एक योद्धा हुन् र फेरि एक पटक च्याम्पियन बन्नेछन् । अहिले लागि राजा गद्दिमा फर्किएको छ,” फ्युरीले भने ।
