बाग्मती युवा क्लबलाई टाई ब्रेकरमा ४–२ ले पराजित गर्दै भारतको कञ्चनजंघा एफसी धनगढीमा शुक्रबारदेखि शुरु भएको सुदूरपश्चिम अन्तराष्ट्रिय आमन्त्रण खप्तड गोल्डकपमा बिजयी भएको छ ।
निर्धारित समयसम्म दुवै टीमले गोल रहित बराबरी खेलेपछि खेलको निर्णय टाईब्रेकरबाट लिइएको थियो । कञ्चनजंघालाई जिताउन गोलरक्षक निगम सिंह नायक बने ।
उनले वागमतीका विपिन तुमसिङ मगर र अनिल मगरको प्रहारलाई रोकेका थिए । यसअघिको दुवै हाफमा कञ्चनजंघाले अधिकांश समय बलमा नियन्त्रण लिएको थियो । तर उसले फिनिसिङ्ग भने राम्ररी गर्न सकेको थिएन ।
निगम म्यान अफ द म्याच घोषित भए र १० हजार नगद पुरस्कार प्राप्त गरे । कञ्चनजंघाले अव सेमिफाईनल प्रवेशका लागि आयोजक सुदुरपश्चिम–११ स्पोर्टस क्लबसँग प्रतिस्पर्धा गर्नेछ ।
शनिवारको खेलमा नेपाल एपिएफ क्लबले एनआरटीको सामना गर्नेछ । फागुन ९ गतेखि २० गतेसम्म सञ्चालन हुने प्रतियोगिताको विजेताले २१ लाख १ रुपैँया र उपविजेताले १० लाख १ रुपैँया पाउनेछन् ।
उत्कृष्ट खेलाडीलाई मोटरसाईकल, विभिन्न विधाका उत्कृष्ट खेलाडीलाई १५–१५ हजार पाउनेछन् । प्रतियोगिताको अनुमानित खर्च १ करोड ५० लाख रहेको छ ।
