नेपाली लिग स्पिनर सन्दिप लामिछाने राष्ट्रिय टोलीको जिम्मेवारीका लागि नेपाल फर्किने भएपछि चिन्तामा रहेको अष्ट्रेलियन बिग ब्यास टोली मेलबर्न स्टार्सले बल्ल राहतको सास फेरेको छ ।
अंक तालिकामा मेलबोर्न शिर्ष स्थानमा रहेको छ र क्लालिफायरका लागि उसले अब सिड्नी सिक्सर्स वा एडिलेड स्ट्राइकर्सका लागि खेल्नेछ । तर मेलबर्नका लागि सन्दिप भने नहुने भएका छन् । नेपालमा आयोजना हुन गइरहेको आईसिसि क्रिकेट वल्र्ड कप लिग टुमा ओमान र अमेरिका सम्मिलित ट्राइ सिरिजका लागि सन्दिप नेपाल आउन लागेका हुन् ।
मेलबर्नको टोलीमा अर्को उल्लेखनीय प्रदर्शन गर्दै सन्दिपले १३ खेलमा १५ विकेट लिइसकेका थिए । उनी ट्वान्टी ट्वान्टी इतिहासमा नेपालका लागि १ सय विकेट लिने बलर बन्न मात्र एक विकेटले टाढा रहेका छन् ।
यसअघि मेलबर्नका लागि अर्का महत्वपूर्ण खेलाडी पाकिस्तानी फास्ट बलर हरिस रउफ पनि बङ्गलादेशसँगको ट्वान्टी ट्वान्टी सिरिजका लागि अष्ट्रेलिया छोडेका थिए । बिग ब्यास लिगको पहिलो उपाधि जित्ने दाउमा रहेको मेलबर्नका लागि प्रतियोगिताको महत्वपूर्ण क्षणमै दुई प्रमुख खेलाडी नखेल्नेपछि टोली चिन्तामा रहेको थियो ।
तर आइतबार मलेबर्नले राहतको सास फे¥यो । उसका लागि रउफ अष्ट्रेलिया फर्कने भएका छन् । रावलपिण्डीमा बङ्गलादेशबिरुद्ध फेब्रुवरी ७ देखि शुरु हुने टेस्ट सिरिजका लागि रउफ पनि टोलीमा पर्ने सम्भावन रहेको थियो । तर पाकिस्तानी टेस्ट टिममा उनी नपरेपछि रउफ मेलबर्नका लागि उपस्थित हुने भएका हुन् ।
रउफ पाकिस्तानी टोलीमा पहिलो पटक पर्दै बङ्गलादेशबिरुद्धको सिरिज खेल्न गएको समय मेलबर्नले चार मध्ये तीन खेलमा पराजय बेहोरेको थियो । प्रतियोगितामा उत्कृष्ट प्रदर्शन गरेका रउफले मात्र ७ खेल खेल्दै १६ विकेट लिएका छन् ।
जारी बिग ब्यास लिगमा सिड्नी थण्डरका ड्यानियल स्याम्स १४ खेलबाट २५ विकेट लिदै सर्वाधिक विकेट लिने खेलाडीको सुचीमा अग्रस्थानमा रहेका छन् ।
