गत जुलाईको विम्बल्डनमा आफ्नै आइडल भेनस विलियम्सलाई पहिलो चरणमै पराजित गर्दै कोको गउफले महिला टेनिसमा आफ्नो आगमनको संकेत दिएकी थिइन् ।
१५ बर्षिय गउफले ३९ बर्षिय भिनसलाई पराजित गर्दा केहीले अचम्मका साथ हेरेका त थिए नै तर कतिले भने यसलाई सामान्य लिएका पनि थिए । महिला टेनिसमा एक छत्र राज अहिले विलियम्स दिदि बहिनीको पनि छैन । नयाँ खेलाडीले टप सिडलाई पराजित महिला ग्राण्ड स्ल्याममा धेरै पटक पराजित गरेका छन् र नयाँ खेलाडीहरुले पनि उपाधि जितेका छन् ।
लाट्भियाकी जेलेना ओस्तापेन्को र जापानी नाओमी ओसाका पछिल्लो समय महिला टेनिसमा सबैलाई स्तब्ध पार्दै ग्राण्ड स्लामको उपाधि नै जितेर देखाउने नामहरु हो । तीन महिनाअघि गउफले ओस्तापेन्कोलाई नै लिञ्ज ओपनको फाइनलमा पराजित गर्दै डब्लुटिए (उमन्स टेनिस एशोसिएसन) इतिहासमा एकलतर्फको उपाधि जित्ने सबैभन्दा कान्छो उमेरको खेलाडी बनिन् ।
भेनसलाई हराएर तहल्का मच्चाएकी गउफलाई अब चुनौति थियो आफैलाई साबित गर्ने । उनि यसपटक फेरि ग्राण्ड स्ल्याममा फर्किन् र पहिलो चरणमै बिपक्षी पाइन भेनस । आफ्नै अमेरिकी भेटेरानलाई विम्बल्डनमा हराएकी गउफले आफूलाई साबित गराएरै छाडिन् । विम्बल्डनमा जस्तै उनले भेनसलाई ७–६ (७–५), ६–३ को सोझो सेटमा हराइन् ।
अन्तिम अंक आफ्नो पक्षमा आए–नआएकोमा असमञ्जसमा परेकी गउफले खुशियाली ब्यक्त गर्न केही ढिला गरिन् तर उनले अर्को इतिहास रचिसकेकी थिइन् । “उनि (भेनस) एकदम राम्रो खेलिरहेकी थिइन् र म आजको खेललाई लिएर केही नर्भस पनि थिए । मेरो पहिलो खेल फेरि भेनससँग नै हुने भनेपछि म स्तब्ध थिए तर यो चरण पार गर्न सकेकोमा म खुशि छु,” गउफले भनिन् ।
