अष्ट्रेलियन क्रिकेट लिजेण्ड शेन वार्नको ब्यागी ग्रिन (टेस्ट क्याप) ले अष्ट्रेलियामा लागेको डढेलोसँग लड्न खडा गरिएको कोषका लागि १० लाख अष्ट्रेलियन डलर उठाएको छ ।
५० बर्षिय लेग स्पिन लिजेण्ड वार्नले बिहिबार आफ्नो क्यापलाई लिलामीमा राखेका थिए । सिड्नीका एक ब्यक्तिले खरिद गरेको क्याप वार्नले आफ्नो पुरै टेस्ट करिअरमा लगाएका थिए । वार्नले अष्ट्रेलियाका लागि एक सय ४५ टेस्ट खेल्दै कुल ७ सय ८ विकेट लिएका थिए ।
पुरै बिश्वको ध्यान तानिरहेको अष्ट्रेलियाको डढेलोमा हालसम्म एक अर्ब जनावरहरुको मारिसकेका छन् भने २७ मानिसको पनि मृत्यु भइसकेको छ । लिलामीबाट उठेको पुरै पैसा अष्ट्रेलिया रेड क्रस डिजास्टर रिलिफ एण्ड रिकभरी फण्डलाई जानेछ ।
निकै ठूलो मुल्यमा आफ्नो क्याप बिकेपछि अचम्ममा परेका वार्नले सिड्नीका उक्त व्यक्तिलाई धन्यबाद पनि दिएका थिए । वार्नको क्यापको लागि खर्च गरिएको पैसा सन् २००३ मा अर्का अष्ट्रेलियन लिजेण्ड सर डोनाल्ड ब्राडम्यानको क्यापले पाएको भन्दा दुई गुण बढी हो । ब्राडम्यानको क्याप ४ लाख २५ हजार अष्ट्रेलियन डलरमा बिक्री भएको थियो ।
वार्न टेस्ट क्रिकेटमा बिश्वमै दोश्रो सफल बलर हुन । टेस्ट क्रिकेटमा सर्वाधिक बढी विकेट लिने किर्तिमान श्रीलंकन स्पिन लिजेण्ड मुथैया मुरलीधरणको नाममा रहेको छ । उनले ८ सय विकेट लिएका छन् ।
अष्ट्रेलियाको डेढेलोसँग लड्नका लागि बिश्वभरका खेलाडीहरुले सहयोगको बाचा गरेका छन् । फर्मुला वान ड्राइभर लेविस ह्यामिल्टनले यसअघि एक च्यारिटीलाई ३ लाख ८० हजार पाउण्ड दिएका थिए । टेनिस स्टार नोभाक जोकोभिच, रफाएल नाडाल, रोजर फेडेरर र सेरेना विलियम्सले पनि सहयोग गर्ने बाचा गरेका छन् ।
