बिश्व जुनियर बरियतामा भर्खरै १४ औं स्थानमा उक्लेका उदीयमान खेलाडी प्रिन्स दाहाल प्रेसिडेन्ट कप नेपाल ईन्टरनेशनल सिरिज मा पुरुष एकल तर्फ सेमिफाइनल प्रवेश गरेका छन् ।
दशरथ रंगशालास्थित राखेप कभर्ड हलमा भएको बिहिबारको खेलमा प्रिन्सले भारतीय आयन रसिदलाई २१–१०, २१–९ ले पराजित गर्दै अन्तिम चारमा स्थान बनाउन सफल भएका हुन् । प्रिन्स मिक्सड डबल्समा भने पराजित भए । रसिला महर्जन र प्रिन्सको जोडी भारतका आयन रसिद र तस्निम मिरसँंग २४–२६, २१–१४ र २१–८ ले पराजित भएका थिए ।
नेपाल ब्याडमिन्टन संघको आयोजनामा भएको प्रतियोगिताको महिला एकल तर्फ निता लम्साल नेपालकै निलिमा महरालाई २१–१२, २१–६ ले पराजित गर्दै अन्तिम चारमा स्थान बनाउन सफल भईन् । यस्तै निताले दोहोरो जित निकाल्ने क्रममा गोकुल जोरा संग मिलेर मिक्सड डबल्समा नेपालकै नरेन्द्र बम र निलिमा महरालाई २१–१६, २१–१३ ले पराजित गर्दै सेमिफाईनलमा स्थान बनाईन् ।
पुरुष एकल तर्फको अर्को खेलमा नेपालका नरेन्द्र बम श्रीलङ्काका दुमिन्दु अवेविक्रमासंग २१–७, २१–९ को सोझो सेटमा पराजि हुन पुगे । पुरुष एकल तर्फ भारतका अभिन बशिष्ठले श्रीलङ्काकाका दिगायु कहातापितियालाई २१–१५, २१–८ ले तथा भारतका मिरब लुवाङ्गले आफ्नै देशका शिभम कुमार मिश्रलाई २१–१२, २१–१६ ले पराजित गर्दै सेमिमा स्थान पक्का गरे ।
प्रतियोगितामा यु – १९ को विधामा मात्र प्रतिस्पर्धा भईरहेको छ ।