आगामी फेब्रुअरी पाँच देखि १२ तारिख सम्म नेपालमा आयोजना हुने विश्वकप छनोट लिग दुईको लागि नेपाली टोलीले आफ्नो बन्द प्रशिक्षण पोखरामा गर्ने भएको छ । त्यस्तै नेपाली टोलीले आगामी हफ्ताबाट प्रशिक्षण पनि शुरु गर्ने भएको हो ।
क्रिकेटिंगनेपालसँग कुरा गर्दै नेपाल क्रिकेट संघ (क्यान) का अध्यक्ष चतुर बहादुर चन्दले नेपालमा आयोजना हुन लागेको विश्वकप छनोट लिग दुई अन्तर्गत नेपाल, ओमान र अमेरिका सम्मिलित त्रिकोणात्मक शृंखलाका लागि नेपाली टोलीको बन्द प्रशिक्षण पोखरामा गर्ने बताए ।
‘प्रतियोगिता आउनका लागि करिब एक महिना मात्र बाँकी रहेको छ । टियु क्रिकेट मैदानमा पिच तथा आउटफिल्डको कामहरु धमाधम जारी रहेको छ । जसले गर्दा टियुमा अभ्यास गर्न गारो छ । हुन त मुलपानी पनि रहेको छ तर पनि हामी पोखरामा बन्द प्रशिक्षणको लागि पहल गर्दै छौं,’ अध्यक्ष चन्दले बताए ।
‘नेपाली टोलीमा रहेका प्राय खेलाडीहरु इटहरीमा जारी मनमोहन मेमोरियल कप एकदिवसीय खेलमा ब्यस्त रहेकाले हामी १-२ दिनमा नै कहिलेबाट र कहाँ बन्द प्रशिक्षण राख्ने टुंगो लगाउने छौं । भोलि अथवा पर्सि (आइतबार / सोमबार) हामी बोर्ड मिटिंग राखेर यस बारेमा निर्णय गर्नेछौं ।’