इङ्गलिस प्रिमियर लिगको अग्रस्थानमा रहेको लिभरपुल सेफिल्ड युनाइटडलाई २–० ले पराजित गर्दै एक पुरा बर्ष अपराजित रहने एक मात्र टोली बन्न सफल भएको छ ।
भाग्यले साथ दिएपछि लिभरपुलले बिहिबार भएको खेलको चौथा मिनेट अग्रता बनाएको थियो । जर्ज बाल्डोक चिप्लिएपछि एण्डी रोर्बटसनले मोहम्मद सलाहलाई सहज गोलको अवसर मिलाइदिएका थिए । सलाहकै पासमा सादियो मानेले आफ्नो दोश्रो प्रयासमा गोल गर्दै लिभरपुललाई यो सिजन १९ औं जित दिलाएका थिए ।
जितपछि लिभरपुलको अंक तालिकामा १३ अंकको अग्रता कायम नै रहेको छ । मात्र एक खेलमा बराबरी गरेको लिभरपुलको २० खेलबाट ५८ अंक भएको छ । दोश्रो स्थानमा रहेको लेस्टरको ४५ र तेश्रो स्थानको म्यानचेस्टर सिटीको ४४ अंक भएको छ । दुवैले समान २१ खेल खेलेका छन् ।
लिभरपुलले २०१९ मा खेलेका ३७ खेलहरुमा ८९ गोल गरिसकेको छ । यसअघि उसले गत सिजन जनवरी ३ मा भएको म्यानचेस्टर सिटीबिरुद्धको खेलमा २–१ को पराजय बेहोरेको थियो । लिभरपुलले यो सिजन पराजय बेहोरेको च्याम्पियन्स लिगमा मात्रै हो । लिग चरणमा लिभरपुललाई इटालियन क्लब नापोलीले पराजित गरेको थियो ।
योर्गन क्लोपको व्यवस्थापनमा प्रिमियर लिगमा एक बर्ष अपराजित रहने लिभरपुल तेश्रो टोली हो । यसअघि आर्सनल र चेल्सीले पनि एक बर्ष प्रिमियर लिगमा पराजित नभई टुङ्गाएका थिए ।