अनु अधिकारीले एकपक्षीय खेलमा श्रीलंकन खेलाडी डन पाउलु बदल्गेलाई टेक्निकल नकआउट हानेपछि नेपालले १३ औं दक्षिण
एसियाली खेलकुदमा करातेमा सोमबार खेलिएका ९ स्पर्धामा ९ वटामा स्वर्ण पदक जित्न सफल भएको छ । निकै नै आक्रमक खेलेकी अनुको अगाडी बङ्गलादेश र श्रीलंकाका दुवै बिपक्षी तीन मिनेट पनि टिक्न सकेका थिएनन् । ५० केजी मुनिको तौल समुहमा अनुले पहिलो खेलमा बङ्गलादेशी फामिदा अख्तरलाई ८–० ले पराजित गरिन् । उनको जितसँगै नेपालको स्वर्ण संख्या १३ पुगेको छ ।
अख्तर नकआउट हुदा अझै ५० सेकेण्ड बाकी रहेको थियो । बदल्गेको अनुको अगाडी पूर्ण रुपमा चल्न सकिनन् । एक मिनेट १६ सेकेण्ड बाकी हुँदा बदल्गे नकआउट भएकी थिइन् । तीन मिनेट अगाडी ८ अंक लिएको खण्डमा बिपक्षी टेक्नीकल नकआउट हुन्छ ।
नेपाल सोमबार भएका ९ मध्ये मात्र दुई स्पर्धामा चुकेको थियो । कुसुम खड्काले नेपालका लागि ११ औं स्वर्ण पदक जितेकी थिइन् । कुसुमले फाइनलमा बङ्गलादेशकी मोञ्जेरा बोर्नालाई ३–२ ले हराइन् ।
नेपालका लागि बिप्लव लाल श्रेष्ठ, मण्डेकाजी श्रेष्ठले एकल काता र टिम काता, महिला टिम काता र लक्ष्मण खड्काले स्वर्ण जितेका थिए । नेपालले साग औपचारिक रुपमा शुरु भएको दोश्रो दिन तेक्वान्दोमा चार स्वर्ण र ट्रयाथ्लनमा एक स्वर्ण जितेको छ ।