युएई राष्ट्रिय क्रिकेट टोलीका कप्तान रोहन मुस्तफाले एक पटक फेरि नेपाली ट्वान्टी ट्वान्टी फ्राञ्चाइज लिगमा उत्कृष्ट प्रदर्शन गर्दै उत्कृष्ट खेलाडी घोषित भएका छन् ।
पोखरा प्रिमियर लिग बिजेता चितवन राइनोजबाट खेल्दै मुस्तफाले उत्कृष्ट प्रदर्शन गरेपछि म्यान अफ द सिरिज नै घोषित भए । शनिबार भएको फाइनलमा पारस खड्काको कप्तानीमा चितवनले बिराटनगर टाइटन्सलाई ३२ रनले पराजित गरेको थियो ।
मुस्तफाले पोखरा प्रिमियर लिगमा ब्याटिङ्ग र बलिङ्ग दुवै तर्फ उत्कृष्ट प्रदर्शन गरेका थिए । उनले तीन अद्र्धशतक सहित २ सय ६ रन बनाए भने ९ विकेट पनि लिएका थिए । उनले यसअघि धनगढी प्रिमियर लिगमा पनि टिम चौराहा धनगढीबाट खेल्दै म्यान अफ द सिरिज पाएका थिए ।
यस्तै प्रतियोगिताको उत्कृष्ट ब्याट्स्म्यान काठमाडौं गोल्डेन वारियर्सका कप्तान ज्ञानेन्द्र मल्ल घोषित भए । धनगढी ब्लुजबिरुद्ध आकर्षक शतक प्रहार गरेका ज्ञानेन्द्रले २०१ रन बनाएका थिए । उत्कृष्ट बलर चितवनै करण केसी भएका थिए । उनले कुल १४ विकेट लिएका थिए ।
शनिबार सम्पन्न फाइनलमा पनि उनले तीन विकेट लिएका थिए । मुस्तफा, ज्ञानेन्द्र र करणले टिभिएस अपाचे बाइक पाएका थिए ।
बिराटनगर टाइटन्सका ब्याट्स्म्यान लोकश बम मोस्ट भ्यालुएबल प्लेयर घोषित भए । उनले एक लाख रुपैया प्राप्त गरे । उदीयमान खेलाडी धनगढी ब्लुजकै बलर अनिल खरेल घोषित भए । उनले पाँच म्याचबाट ८ विकेट लिएका थिए । अनिलले ५० हजार रुपैया पुरस्कार प्राप्त गरे ।